Gusenga/ Pastor Desire Habyarimana

Kugirango Imana idukoreshe ni uko ibanza kutwubaka imbere, ikubaka mu mwuka wacu, ikubaka amarangamutima no mu buryo bufatika. Nehemiya yari afite umutwaro atawutewe n’inzara ntabwo yari ashonje kuko yari afite akazi gakomeye ibwami, ariko yagize umutwaro w’ igihugu cyabo kuko cyari cyarasenyutse ajya gusana inkike. Nehemiya yari umunyamasengesho. Rimwe yashyiriye umwami vino kuko yari umuziritsi ariko ayijyana afite umubabaro mwinshi kuko yari yumvise amakuru mabi yuko I Yerusaremu hasenyutse, hahiye. Umwami amubonye aramubwirango ndareba Nehemiya urababaye kandi ndabiziko utarwaye, mu byukuri gushyira umwami vino umeze utyo byanganaga no gupfa bahitaga bakwica, ariko Nehemiya asaba akanya aragenda ariherera arasenga kugirango azabone icyo avugana n’umwami .Bibiliya iravugango kubwo gusenga ukuboko kwiza kw’Imana kuba ku buzima bwe, umwami amuha ibyo yasabye byose kubw’ukuboko kwiza kw’Imana kwari ku buzima bwe.

Mu gitabo cya Yakobo 5:16-17 haravugango ”Mwaturirane ibyaha byanyu kandi musabirane, kugira ngo mukizwe. Gusenga k’umukiranutsi kugira umumaro mwinshi, iyo asenganye umwete. 17 Dore Eliya yari umuntu umeze nkatwe asaba cyane ko imvura itagwa, imvura imara imyaka itatu n’amezi atandatu itagwa. 18 Arongera arasenga, nuko ijuru rigusha imvura, ubutaka bumeza imyaka yabwo.”

Bibiliya iravuze ngo mwaturirane ibyaha byanyu kugirango mukizwe, muri iki gihugu abantu barasenga, abakrisito ni nka mirongwinani na gatanu ku ijana (85%) ariko hari ikintu abantu bibagirwa , bibagirwako gusenga bigira inzitizi ariko gusenga watuye ibyaha bituma isengesho ritagira inzitizi. Iyo usenga uri umunyabyaha Imana ntishobora kukumva bene ayo masengesho Imana iyita urusaku. Gusenga kutakubujije kwiba, gusenga kutakubujije gusambana, gusenga kutakubujije kwangana, gusenga kutatumye ushobora gusaba imbabazi uwo wahemukiye uko si ugusenga.

Muri iki gihugu abantu barasenga .Abantu basenga iminsi mirongo ine, abandi makumyabiri n’umwe, irindwi , itatu, umwe abandi bagasenga ayo kunzenguruka mu muhanda, abandi bagasengera n’ahatemewe. Ariko ikibazo dusenga twihannye? Uziko abantu basenga badahinduka, uziko abantu basenga bakagumana ibyaha, Yesu yigeze abivuga ‘nujya gutura ukibukako hari icyo upfa na mugenzi wawe siga ituro ubanze ugende wikiranure nawe hanyuma ubone kujya gusenga wakuyeho inzitizi. Impamvu nyinshi amasengesho adasubizwa ni uko aba afite inzitizi. Gusenga kwari gukwiye kubanza guhindura ubuzima bwacu tukabanza tukezwa. Kuba twuzura insengero ku cyumweru si cyo Imana iha agaciro, nubwo wasenga iminota itatu ariko wabanje kwihana.

Akenshi hari ubwo iyo dusenga tuba dukeneye igisubizo kiza kivuye ku Mana hari n’abifashisha abahanuzi kugirango bumve ibyo Imana ibabwira cyangwa babarondore ariko mbere yuko Imana ikurondora nawe ubwawe uriyizi. Usanga umuntu akuramo inda akajya mu masengesho y’iminsi 21 na 40 atatuye agategereza 8 umugisha kandi afite amaraso ku biganza cyangwa umugabo utunze abagore barenze umwe , nawe ugasanga asenga amasengesho y’iminsi myinshi ategereje 78mugisha w’Imana, usanga abantu bakorana umurimo w’Imana ibyaha bikomeye ababeshyera abandi, abasebebanya, abaroga, abagambanira abandi ngo babasimbure mu myanya y’icyubahiro,…

Mu gitabo cya Mika hatanga igisubizo neza ku bantu basenga batihanye “Mbese nditwara ku Uwiteka, ngapfukamira Imana isumba byose nyituye iki? Nayitwaraho njyanye ibitambo byoswa n’inyana zimaze umwaka? Aho Uwiteka yakwemera amapfizi y’intama ibihumbi, cyangwa imigezi y’amavuta ya elayo inzovu? Ese natanga imfura yanjye ku gicumuro cyanjye, imbuto y’umubiri wanjye nkayihonga ku cyaha cy’ubugingo bwanjye? Yewe mwana w’umuntu we, yakweretse icyiza icyo ari cyo. Icyo Uwiteka agushakaho ni iki? Ni ugukora ibyo gukiranuka no gukunda kubabarira, no kugendana n’Imana yawe wicisha bugufi.” (Mika 6:6-8)

Hari abantu bakora ibyaha bagahita baza gutura menshi cyangwa bagashaka uko baba inshuti na pasiteri, agatangira kwitwara neza ntabwo ibyaha bikurwaho niyo mpamvu, n’ubwo wagura ibyuma by’amakorari yose yo mu Rwanda, n’ubwo wakubaka insengero nyinshi.

Icyaha gikurwaho no kucyatura, utihannye ntabwo wababarirwa. Umugabo umwe yakoze icyaha cy’ubusambanyi ari mu giturage ahita avayo aza mu mujyi hashira imyaka icumi aracuruza arakira akora imirimo y’Imana ikomeye mu rusengero baranamuzamura mu ntera nyuma y’iyo myaka icumi Imana iramubwira ngo nasubire iwabo, ageze iwabo ajya inyuma mu rutoki rw’iwabo harimo ibuye, Imana iramubwira ngo iri buye ntiwarisize hano undi ati ye, ntihashize imya icumi ati ye, hari akantu ubona kavuyeho riracyari kwa kundi, Imana iramubwirango ni nako icyaha cy’ubusambanyi wakoze gihora imbere yanjye.

Abantu bakora ibyaha bikomeye bakabisengana, bakabihimbazanya, bakabiryana igaburo ryera, babibana abashumba, bakaba abapotre, bakaba ababishopu bikazageza igihe babimenyereye bakiha amahoro bagakorera Imana ariko nta bugingo buhoraho.

Isengesho Imana yumva ni iry’abakiranutsi kuko Imana imurinda nk’imbone y’ijisho, Imana ibitaho ni abantu Imana iha agaciro, umuntu umwe yigeze gutanga urugero: inkoko iyo uyitunze, uyigaburira, igaturaga amagi yayo ikabona imishwi rimwe ukazibeshya ugakandagira umushwi w’inkoko, ihita iza yarakaye ikazana inzara ishaka kugukuramo amaso, ikakubwirango ibigori wampaga ubyihorere n’aho wandyamishaga uhihore ariko ntukankandagirire abana.
Niba inkoko itabara abana bayo nutaka uri umukiranutsi Imana izabura kukumva ? Niba Yesu akubonaho amaraso ye Imana izakurangarana ? Isengesho ry’umukiranutsi rigira umumaro mwinshi. Bibiliya yuzuye abantu benshi cyane basenze Imana bakiranutse Imana irabatabara. Daniyeli bashatse kumugaburira intare zimaze gatatu zitarya ariko kuko yari umukiranutsi Imana iramutabara. Twavuga na Esiteri wateguye amasengesho ajya ibwami bamutunga inkoni y’izahabu.

Hari inyigisho z’ubuyobe zivugako hari ubuntu busaga: Iyo umuntu yakijijwe naho yakiba, akica, akabeshya , agasambana ngo ibyaha Imana yarangije kubibabarira, yabibabariye rimwe gusa, izo nyigisho ni ubuyobe kuko iyi nzira isaba kwezwa kwa buri munsi. Yesu yaravuzengo kuva kera ubwami bw’Imana buratwaranirwa intwarane zibugishamo imbaraga. Mu byahishuwe haravugango hahirwa abamesera ibishura byabo mu maraso y’umwana w’intama nibo bazemerwa kwinjira mu rurembo Siyoni . Ikibazo si ukwandura ahubwo ikibazo ni ukutamesa.

Amaraso ya Yesu arahari atweze buri munsi kandi yeza uwemeye kwihana.

Ismael@Agakiza.org