Gusengana Umwete / Pastor Habyarimana Desire

Nta mpano yo gusenga ibaho, gusenga ni itegeko. Ahantu hose muri bibiliya uzasoma ijambo gusenga usanga ari itegeko: Musengane umwete, musenge ubudasiba, musenge mu buryo bwose bwo gusenga. Amasengesho ni kimwe mu bigomba kuba bigize ubuzima bwacu, abantu bose bageze ku bintu bitangaje muri bibiliya ni abantu basenganye umwete ariko muri iki gihe gusenga sibyo abantu bashyizeho umwete.

Mu gitabo cya Yakobo 5:16-17 haravugango ”Mwaturirane ibyaha byanyu kandi musabirane, kugira ngo mukizwe. Gusenga k’umukiranutsi kugira umumaro mwinshi, iyo asenganye umwete. Dore Eliya yari umuntu umeze nkatwe asaba cyane ko imvura itagwa, imvura imara imyaka itatu n’amezi atandatu itagwa. Arongera arasenga, nuko ijuru rigusha imvura, ubutaka bumeza imyaka yabwo.”

Ese mu masaha yawe makumyabiri n’ane Yesu umuhaho angahe ? Ese uyakoresha ute? Ni ryari ugirana ubusabane n’Imana? Nta handi muzasabanira atari mu gusenga. Ni yo mpamvu dukwiye gusengana umwete. Bibiliya iduha urugero, Yesu yirirwaga yigisha abantu ariko buri joro akarara asenga, akambara imbaraga azakoresha bukeye. Satani turwana nawe ni umurezi we ntahwema ariko twe tuba turangaye dusengana ubunebwe. Birababaje kubona umuntu ashobora kureba filime amasaha abiri ariko yajya gusenga akavugango reka dusenge muri make ngo turananiwe, ibintu byose bitagira umumaro wabiboneye umwanya ariko gusenga ho uhageze usenga muri make ! gusenga bigira umumaro iyo umuntu asenganye umwete, umwete wawunganya iki mu gusenga?

Hari umuntu ushobora gutangira isengesho ntabone amagambo yo kuvuga nyamara bavuga : ibirayi byazamutse, izuba ryavuye, ibintu bitagenda aravuga agafashwa cyane nyamara gusengana umwete byaramunaniye.

Nidusengana umwete tuzabona impinduka kandi ibyo gusengera birahari: Wasengera urubyiruko rumeze nabi mu biyobya bwenge, wasengera abana bato batazajya mu busambanyi, wasengeye abarwayi. wasengera igihugu kikagira umugisha, ugasengera umurimo w’Imana ukaguka, Bibiliya iravuga ngo musengere abategetsi kugirango ni babona amahoro namwe mubone amahoro, Imana ijye ibafasha mu gufata ibyemezo, erega abanyamasengesho nibo batuma igihugu kigira umugisha.
Iyo abantu basenze imvura igwira igihe, Imana ikuraho impanuka , indwara z’ibyorezo, imyuka mibi irahunga, nta bagore n’abagabo bicana. Iyo abantu basenze habaho impinduka ariko iyo abantu badasenga ibyaha biriyongera. Hari ikintu kibabaje ni uko amatorero n’imiryango ya gikristo bivuka ariko ibyaha bigakomeza kwiyongera kandi wareba ibyo byaha ugasanga no mu matorero niho biri, biterwa nuko abantu basenga ariko ntibihane.

Umwete wawe uranga iki ? Ibyo ufitiye umwete ni ibiki ? Wasanga ari ubuzima buri hanze aha, yego ubuzima bwaba bukomeye ariko ntibukwiye kukubuza umwete wo gusenga. Niba utamara iminsi itatu wicaye usenga, sengera mu modoka ugenda, sengera mu muhanda, senga uri mu kazi , ntukareke gusenga kuko gusenga bigira umumaro iyo umuntu asenganye umwete. Impamvu gusenga kwawe kutatanze umusarruro wabuze umwete mu gusenga. Abantu bose basenganye umwete bafite amahoro mu mutima banyuzwe nuko Imana ibagize kandi bagirirwa neza n’Imana mu buzima bwabo bwa buri munsi. Wacitse intege: byashobokako waba warakomerekeye mu rusengero, byashobokako waba waratinze gusubizwa, hari ibintu byagenze uko utabyifuzaga bituma ucika intege.

Imbuto ziva mu gusengana umwete

Bibiliya iravuga ngo Eliya yari umuntu umeze nka twe asabako imvura itagwa imara imyaka itatu n’amezi atandatu itagwa, arongera arasenga imvura iragwa.

Eliya yabayeho mu gihe hari akavuyo kari mu matorero nk’akariho muri iyi minsi. Eliya yabayeho mu gihe Ahabu yari amaze kurongora Yezebeli umunyamahangakazi, aza azanye imana z’inyamahanga muri isirayeli, abatambyi bo munzu y’Imana baravangirwa. Iyo bashakagako imvura igwa basengaga imana ya Yezebeli.Eliya areba urwo ruvange, Eiya aravugango ntabanje kubivuganaho n’Imana reka mpagarike iyi mvura, muzamenyako Imana ya Yezebeli idatanga imvura, ahita ayihagarika Imana iramushyigikira. Ikindi gihe ajya kwiyereka Ahabu aramubwirango ni wowe wateje Isirayeli akaga, Eliya aramusubizango ntabwo arinjye ahubwo ni ubusambanyi busigaye buri mu bwami bwawe,aramubwira ati” tuzamuke ku musozi wa Karumeli, icyo gihe umwami yari afite abahanuzi bamuhanurira ibinyoma Magana inani na mirongo itanu(850).

Abahanuzi b’ubu birirwa bavuga ngo Imana iguhaye umugisha ikujyanye I Burayi, igutuje Nyarutarama, Imana irakuzamuye mu ntera ariko hano wakibaza iyo Mana izamura umuntu mu ntera ntimukize ubusambanyi , ntimukize kubeshya, iyo Mana izamura umuntu mu ntera abanje kugambanira uwo bakorana, akamubeshyera ibinyoma, abanje kuriganya imisoro. Ibaze iyo Mana ibanza kuzamura umuntu mu ntera ikamuha ibishira aho kumuha ubugingo buhoraho iyo ni Imana yo mu ijuru ?

Ahabu yari afite abahanuzi nkabo 850 bazamuka ku musozi karumeli, Eliya aravugango nimwe benshi Imana iribusubirishe umuriro niyo Mana. Bubaka igicaniro bahamagara imana yabo ntiyaza kugera kurwego rwo kwikebesha inzembe ngo ibabone ariko ntiyazana umuriro ariko Eliya kuko yari umuntu ukijijwe w’Imana usengana umwete we yabanje kubaka igicaniro, asukaho amazi ntiyavuga amagambo meshi aravuga ngo Mana uyu munsi bigaragare ko uri Imana ya Isirayeli, bigaragare ko ndi umugaragu wawe, uwo mwanya umuriro uherako uva mu ijuru utwika amabuye n’amazi n’igitambo ijuru riratumuka uhereye ku mwami Ahabu na b’abahanuzi bose baherako baca bugufi, barunama Eliya aravuga ngo abo bahanuzi bose mubicishe inkota.

Mwa bahanuzi mwe mwitonde niba mudahanurira abantu ibituma bihana ibyaha no kubyatura muzarushaho kugirana ikibazo n’Imana.

Bimwe mubituma Imana idakora mu buzima bwanyu ni uko hari ibyo mwagiriye umwe kurusha gusenga no gukiranuka no kwihana.

Ismael@Agakiza.org