Imyitwarire 5 ikwiye kuranga umukozi w’Imana

Aho tugenda, aho dutuye ndetse no mubyo dukora hari abantu usanga barabaye intangarugero kubw’ibyiza bakora. Usanga umuntu wese ashaka kwigana imico n’imyitwarire yabo, gusa usanga abantu nk’aba bagenda babura uko iminsi ihita ariko na none Bibiliya isigarana ibihamya by’abantu bagiye baba ibyitegererezo bo kwigirwaho.

Tugiye kuganira ku myifatire byibura Itanu (5) buri mukozi w’Imana akwiye kugira,hashingiwe ku itangiriro ry’igitabo cya Abaroma cy’Intumwa Pawulo.Iyi myifatire yaranze ubuzima n’umurimo bya Pawulo ni nabyo byiza biranga ubuzima bw’umwuka bwa buri Mukrisito.Biboneka mu Abaroma 1:8-12.

Iyi ni imwe mu myifatire ikwiye kubaranga :

1.Arangwa no gushima Imana

Mbere na mbere, nshimira Imana yanjye binyuze kuri Yesu Kristo ku birebana namwe mwese, kuko ukwizera kwanyu kuvugwa mu isi yose.’’ (Romans 1:8)

Nyuma yo gusoma urwandiko pawulo yandikiye Abaroma bose,tubona yuko Pawulo yagiraga imikorere runaka n’inyigisho zihambaye kandi zifatiye runini abantu.
Umukozi w’Imana akwiye gufata umwanya agashima Imana, hirengagijwe ibindi bikorwa byumvishako ari iby’ ingenzi.
Mbere yuko asaba ikintu icyo ari cyo cyose cyangwa agira icyo abwira abasomyi bibitabo bye,Pawulo abanza gushimira Umugenga w’ibintu byose (Imana).Gukomeza gushima Imana mu buzima bw’umwizera bihora byisubiramo cyane mu nyigisho za Pawulo (urugero: Abafilipi. 4:6, 1Timoteyo 2:1).

Mu byukuri yabwiraga Itorero ry’i Tesaroniki ko gushima Imana aribyo umwami wacu Yesu Kristo ashaka ku mukirisito (1 Abatesaronike. 5:8),Ndetse akanabwira itorero ry’I Roma ko kudashima ari kimwe mu bishyira umuntu kure y’Imana kandi ko ari ikimenyetso ku mutima wigomeka,utanyurwa kandi ko byangwa n’Imana (Abaroma.1:21).

2. Arangwa no gusenga

“ Imana nkorera mu mutima wanjye mvuga ubutumwa bwiza bw’umwana wayo, ni yo ntanzeho umugabo, yuko mbasabira urudaca uko nsenze.” (Abaroma. 1:9)

Ni kangahe mu ntekerezo, mu ntambara z’umwuka, intambara z’ubugingo, gutakaza ibyiringiro , ni ryari dutekerezako twakigobotora ibi bihe bigora umukirisito, igihe twaba tudasenze buri gihe nk’uko bikwiye ? Dukwiye gusenga kenshi kugirango ibindi bibazo byose n’intambara duhura nabyo bitugereho bidafite imbaraga zo kwica ubuzima bw’umwuka (ubugingo). Birumvikana, ibigeregezo bikomeye , ibishuko n’intambara zitandukanye byose tubitsinda binyuze mu isengesho .Nta kwihagararaho ahubwo duwiye guca bugufi tugapfukama ku mavi yacu tugasenga.

Atitaye ku kintu icyo aricyo cyose Pawulo yari umugabo w’umunyamasengesho. Ntekerezako nta yindi ntego umwizera wese yakagize hatarimo gusenga Imana.

3. Yerekeza ibye byose ku Mana

“ Kugira ngo naho byamera bite, Imana kungendesha amahoro ubu ikangeza iwanyu” (Abaroma 1:10).

Mu rwandiko rwa Yakobo avugako ikintu cyose dukora gikoreka biturutse kugushaka kw’Imana ishoborabyose. Twakora iki cyangwa kiriya byakunda cyangwa bitakunda tukiri ku isi ubuzima burakomeza , ikintu cyose dufite ni ukubera ubushake bw’Imana (Yakobo 4:13-15).

Mu rwandiko Pawulo yandikiye abaroma ubwo yari mu murwa wa Korinto , yashakaga gusura itorero ry I Roma wenyine ariko yarazi nezako ubuzima bwe buri mu biganza by’Imana, ko akorana n’ubushake bw’Imana. Pawulo yarazi ko ibyo akora byose n’ubwo ariwe ubitekereza ariko siwe ubisohoza. Umukozi w’Imana agomba kumenyako yakowe amaraso ya Yesu ko ubuzima afite atari ubwe ko ahubwo buturuka ku Uwiteka uba muri we (Abagaratiya. 2:20). Nicyo cyari icyifuzo cya Pawulo kugirango abashe guhirwa mu rugendo rwe rwerekeza i Roma.

4. Aha abadafite

“ Kuko nifuza kubonana namwe kugirango mbahe impano y’umwuka ngo ibakomeze” (Abaroma 1:11)

Umukozi w’Imana witanga ahora anyotewe no gufasha abandi mu byo bamukeneyeho, ntagushidikanya turi abakozi b’Imana ntabwo turi abakozi b’abantu. Ariko inzira yagutse yo gukorera Imana ni ugukorera abantu bakomoka kuri yo.Ntabwo Imana ishakako dukorerwa ahubwo ishakako dukorera abandi. Yesu mbere yuko asubira mu ijuru yabajije Petero niba amukunda abimwemereye aramubwira ati “ ragira intama zanjye” bishatse kuvugango ita kubantu banjye. Umukozi w’Imana agaragazwa nuko akorera abantu (Yohana 21:15-17)

5. Agira guca bugufi

« Tubone uko duhumurizanya mwebwe nanjye, mpumurizwe no kwizera kwanyu namwe mube muhumurijwe nu kwanjye » (Abaroma 1 :12)

Pawulo nk’umuntu watangije insengero nyinshi akanavuga ubutumwa ahantu hatandukanye mu gihu cya Roma, ntabwo yishyize hejuru ahubwo yumvagako hari icyo abandi bamwungura nawe aka kibungura doreko yarafite ibintu byinshi yakirata by’umubiri n’iby ’umwuka.

Biratangaje kumva umuntu nka Pawulo abwira abizera bashya ko hari icyo yabungukiraho akumvako yahumurizwa nabo, ntabwo yiyumvishagako we abarenzeho.
Ikikubwira umuntu umaze gukura mu mwuka usanga ibiro by’umubiri abigira bike akiyoroshya akubaha cyane abo asumba akaba inshuti ya bose muri byose ntakindi yirata uretse kwirata Imana.

Gusa muri iyi minsi usanga abantu birata ibintu byinshi ubutunzi, abahanuzi bakirata impano usanga bavugango « impano zanjye, ati njye ndabona » aho usanga abantu babahamagara ngo « nzaze undeberemo », abavugabutumwa bo birata amavuta aho usanga bavuga ngo « amavuta yanjye arahenze », abaririmbyi ugasanga birata amajwi n’ibindi ,ariko twibukeko ijambo ry’Imana rivugako, Imana irwanya abibone naho abicisha bugufi ikabahera ubuntu.

Ismael@Agakiza.org