Uburyo 3 bwagufasha kugira ukwihangana

Kwihangana ni ikintu buri wese yagakwiye kugira. Bisaba imbaraga nyinshi kugirango ubashe kwihanganira ingorane n’imibabaro inyuranye hatabayeho umujinya no kwihorera uretse gusa kwera imbuto z’Umwuka Wera.

Kwihangana ni imbaraga z’Umwuka Wera kuko Iyo uri muri twe utuma twera imbuto: “Ariko rero imbuto z’Umwuka ni urukundo n’ibyishimo n’amahoro, no kwihangana no kugira neza, n’ingeso nziza no gukiranuka, no kugwa neza no kwirinda. Ibimeze bityo nta mategeko abihana.”(Abagalatiya5:22-23)

Muri dictionaire ya Webster hasobanura kwihanagana nko guhangana n’ingorane,ububabare, … wemye, udatinya. Kwihangana na none bivuga gushaka igisubizo cyangwa kubasha kwakira ububabare cyangwa ibikomere hatabayeho umujinya cyangwa kwihorera.

Niba kwihangana ari ukugira ubushobozi bwo kugerageza guhangana n’ibikurwanya cyangwa ibikubabaza hatabayeho kwihorera, birumvikana ko bitoroshye kubigeraho, ariko iyo ufiteUmwuka w’Imana , haboneka imbuto yo kwihangana.
Ese urifuza kubasha kwihangana?Urashaka kuba umugabo cyangwa umugore wihangana ushobora guhangana n’ingorane mu mutuzo?

Aha hari ingero 3 za bibiliya zagufasha kwihangana:

1.Ishimire ko ibikugerageza bitera kwihangana

Nta muntu n’umwe wifuza guca mu bikomeye atifuzako havamo igisubizo cyiza. Abakinnyi bakora imyitozo ibafasha kuba abakinnyi beza b’indashyikirwa, abanyabugeni bahora babukora butuma bunguka ubumenyi bityo bakarushaho kunguka ubumenyi no kunoza neza umurimo bakora. Ni kimwe n’intambara zitandukanye duhura nazo kuko zituma tugira kwihangana.Uko uhura n’ibibazo byinshi niko haboneka amahirwe yo kugira imbaraga zo kwihangana.
“Bene Data, mwemere ko ari iby’ibyishimo rwose nimugubwa gitumo n’ibibagerageza bitari bimwe, mumenye yuko kugeragezwa ko kwizera kwanyu gutera kwihangana.”(Yakobo1:2-3)

2.Isunge Umwuka Wera

Niba kwihangana ari imbuto y’Umwuka Wera, dukwiye gushyikirana na Wo kugirango tubashe kugira kwihangana muri twe. Yesu yatubwiyeko Umwuka Wera azatuyobora mu kuri kose(Yohana16:13) kandi uwo Mwuka uzatwibutsa ibyo Umwami Yesu yavuze byose(Yohana14:26).
Muri make ni ingenzi kubaha ibyo Umwami Yesu yatwigishije. Ntitumwubaha tukamwiha, bidatinze tuzera imbuto zose z’Umwuka Wera.
3.Igira kuri Yesu

Niba dushaka kugira kwihangana muri twe, dukeneye kurebera ku muntu wabashije kwihangana ari we Yesu Kristo.
“Nuko natwe ubwo tugoswe n’igicucu cy’abahamya bangana batyo, twiyambure ibituremerera byose n’icyaha kibasha kutwizingiraho vuba, dusiganirwe aho dutegekwa twihanganye dutumbira Yesu wenyine, ari we Banze ryo kwizera kandi ari we ugusohoza rwose, yihanganiye umusaraba ku bw’ibyishimo byamushyizwe imbere ntiyita ku isoni zawo, yicara iburyo bw’intebe y’Imana.”(Abaheburayo12:1-2)
Kristo niwe rugero rwo kwihangana.Imana ishaka ko tumera nka we kandi uko tuzarushaho gusa na Kristo niko tuzabasha kwihanganira imiryango yacu, inshuti zacu, ndetse n’abatwanga.

Imana iduhe kugira ukwihangana!

sophie@Agakiza.org