Agaciro k’amavuta y’umwuka wera.


2ABAMI 4.1-7
1.Bukeye umugore umwe wo mu bagore b’abahanuzi asanga Elisa aramutakambira ati “Umugaragu wawe ari we mugabo wanjye yarapfuye, kandi uzi ko uwo mugaragu wawe yubahaga Uwiteka. None umwishyuza araje, arashaka kujyana abana banjye bombi ngo abagire imbata ze.”

2.Elisa aramubaza ati “None se nkugire nte? Mbwira niba hari icyo ufite imuhira?” Na we ati “Umuja wawe nta cyo mfite imuhira keretse agaherezo k’utuvuta.”
3.Aramubwira ati “Genda utire ibintu birimo ubusa mu baturanyi bawe bose, ariko ntutire bike. 4.Maze winjirane mu nzu n’abana bawe ukinge, utwo tuvuta udusuke muri ibyo bintu byose, ikintu cyose uko cyuzuye ukibike.”
5.Nuko amusiga aho, yinjirana n’abana be mu nzu arakinga, bamuzanira ibyo bintu asukamo. 6.Nuko ibyo bintu bimaze kuzura abwira umuhungu we ati “Ongera unzanire ikindi kintu.” Na we aramusubiza ati “Nta kindi gisigaye.” Uwo mwanya amavuta arorera kuza.
7.Hanyuma asanga uwo muntu w’Imana arabimubwira. Na we ati “Genda ugurishe ayo mavuta wishyure umwenda wawe, asigara agutungane n’abana bawe.” Iby’umugore w’i Shunemu

Umugabo w’uyu mupfakazi bivugwa ko ari Obadiya wari umunyarugo w’Umwami Ahabu, akaba yarapfuye asize umwenda yari yarafashe yita ku bahanuzi b’Uwiteka, kuko yari yarabahishe kugira ngo Umwamikazi Yezebeli atabica (1Abami 18.4).

Umuhanuzi Elisa, akimara kumenya ayo makuru no gusanga uwo mupfakazi afite nibura utuvuta duke, yamutegetse kudukoresha asuka mu bintu byose birimo ubusa, ahereye ku bye ndetse akanatira ibindi,

Maze Uwiteka amukorera igitangaza, utwo tuvuta duhinduka isoko idakama kugeza igihe ibyo bintu byose byuzuriye, agurisha ayo mavuta yishyura umwenda ndetse asagura n’ayo gutungisha abana be.
Utu tuvuta duke uyu mupfakazi yari afite twagize umumaro ukomeye kuko ari two Umuhanuzi Elisa yahereyeho yinginga Imana ngo imutabare;

Uyu munsi nawe ukeneye kugira amavuta y’Imana (Umwuka Wera), kuko iyo uyafite ubasha guhembura imitima ya benshi ubasangiza ijambo ry’Imana kandi uberera imbuto nziza z’urukundo, maze nawe ugahembuka mu bugingo, ukagira amahoro mu mutima n’umunezero w’agakiza;

Iyo umugabo n’umugore batunze amavuta y’Imana bagira ubwenge bwo kuyobora urugo rwabo, naho umukobwa cyangwa umusore bayafite barinda bava mu kiciro cy’urubyiruko batiyandaritse!

Ishakire amavuta rero, kuko muri iki gihe ibiri kumara amavuta y’abera ni byinshi, ni yo mpamvu usabwa kugira amakenga, ugasaba Imana ikaguha umwuka w’ubwenge no kwirinda icyaha n’igisa na cyo,

Kuko bizakurinda kumera nka ba bakobwa b’abapfapfa bari bategereje umukwe n’ijoro bacanye amatabaza yabo ariko batiteguye amavuta ahagije yo gushyiramo(Matayo 25.1).
Martha@Agakiza.org