Amasomo 4 y’ingenzi dusanga mu nzandiko Pawulo yandikiye Timoteyo

Pawulo ni umuntu wabaye intwari yo kwizera. Birashoboka ko nta muntu n’umwe mu mateka wagize uruhare runini ku itorero nk’ Intumwa Pawulo. Kubw’ibyo, ni ngombwa ko abayobozi b’abakristo muri iki gihe bamwigiraho mugihe dushaka kuyobora ubwoko bw’Imana.

Ku bijyanye n’ubuyobozi, mu rwandiko rwa 1 n’urwa 2 Pawulo yandikiye Timoteyo harimo ubwenge bwinshi n’ubushishozi. Abayobozi b’Abakristo bagomba gucukumbura byimbitse izi nzandiko bityo bakabasha gukora umurimo w’Imana bashize amanga.

Ni muri urwo rwego tugiye kurebera hamwe amasomo ane y’ingenzi dusanga mu nzandiko Pawulo yandikiye Timoteyo:

1.Kurinda umukumbi (1 Timoteyo 1)

Mu rwandiko rwa mbere Pawulo yandikiye Timoteyo, yamushishikarije kurinda abayoboke be abigisha b’ibinyoma. Akaga k’abigisha b’ibinyoma ni inkomyi ku iterambere ry’itorero, amabwiriza Pawulo yahaye Timoteyo ni ukurwanya inyigisho z’ibinyoma kugira ngo ubwoko bw’Imana butayobywa. Pawulo aragira ati:"Ugume muri Efeso nk’uko nakwinginze ubwo najyaga i Makedoniya kugirango wihanangirize bamwe kutigisha ukundi, cyangwa kwita ku migani y’ibinyoma..." (1 Tim. 1: 3-4)

Akaga ko kwigisha ibinyoma ni uko bidateza imbere kwizera nyakuri muri Kristo, ahubwo bitera gushidikanya, ubuhemu, no kutubaha Imana. Ni inshingano za Timoteyo nk’umuyobozi w’itorero kurinda ubwoko bwe abo bigisha b’ibinyoma.

2. Gukomeza kwitoza kubaha Imana

Pawulo ashishikariza Timoteyo kwirinda kwirara, gukomeza gukura mu kubaha Imana no gukiranuka. Soma amagambo akubiye mu rwandiko rwa 1Pawulo yandikiye Timoteyo: 4.

Abayobozi b’Abakristo bagomba gukomeza kwitoza kubaha Imana kugira ngo bashobore kubona ibikoresho byanze bikunze mu mirimo y’Ubwami bw’Imana. Umwanzi ntazigera areka kutugerageza, gutega imitego, no gushaka kurimbura ubwoko bw’Imana.

Ntabwo rero tugomba gucogora gukura muri Kristo, ahubwo twambare intwaro z’Imana buri munsi, duhore twiteguye kurwanya umwanzi.

3. Kwihanganira imibabaro: 2 Timoteyo 2

Kubabazwa bigomba kubaho ku bakristo bose. Nk’uko Kristo yababajwe, n’abamukurikira bose. Tugomba kunyura mu imibabaro ndetse no kwihanganira imibabaro mugihe ije. Ku bijyanye n’imibabaro Timoteyo yahuye na yo, Pawulo yamushishikarije amagambo aboneka muri 2 Timoteyo 2: 1-3, 2Tim :2:8-10.

Abakristo bose bagomba gusangira imibabaro, bakibuka imibabaro Umwami wacu yihanganiye kubwacu. Abayobozi b’Abakristo bagomba kwihanganira imibabaro kubw’icyubahiro cyImana, bafite ibyiringiro byuzuye ko Imana ifite ubushobozi bwo kwita ku mibabaro yacu.

4. Kwigisha ijambo ry’Imana

Yanzura mu rwandiko Pawulo yandikiye Timoteyo, yahaye Timoteyo inshingano yo kwamamaza ijambo ry’Imana, kandi afite ishyaka ryiza ku murimo w’Imana.

Ndagutongera mu maso y’Imana no mu ya Kristo Yesu uzaciraho iteka abazima n’abapfuye, ubwo azaboneka aje kwima ingoma ye. Ubwirize abantu ijambo ry’Imana, ugire umwete mu gihe kigukwiriye no mu kitagukwiriye, uhane, uteshe, uhugure ufite kwihangana kose no kwigisha (2 Tim. 4: 1-2).

Reka ibi bibe inshingano ya buri mukristo w’umuyobozi. Umuyobozi w’ubwoko bw’Imana ntakwiye gucogora kubwiriza inkuru nziza ya Yesu. Mushakashake uko mwakwerekana icyubahiro cy’Imana mukoresheje impano mwahawe ubwo mwakizwaga.

Muri macye, ku bw’impamvu iyo ari yo yose, Imana yaguhisemo gukora umurimo wayo mw’isi binyuze mu bantu. Hagarara ushikamye kandi uragire neza umukumbi w’Imana kugirango ku iherezo ry’urugendo, uzambare ikamba umucamanza utabera azatwambika hamwe n’abihanganiye imibabaro bose.

Source: crosswalk.com

Vestine@agakiza.org