Ese birakwiriye ko tujya gufasha abakene(...)

Kwamamaza

agakiza

Ese birakwiriye ko tujya gufasha abakene tukitwaza itangazamakuru?


Yanditswe na: Ubwanditsi     2020-12-28 05:06:00


Ese birakwiriye ko tujya gufasha abakene tukitwaza itangazamakuru?

Bimaze kumenyerwa ko mu Ukuboza mu bihe bya Noheli n’Ubunani aribwo abantu benshi ku giti cyabo, imiryango ya gikirisitu n’amatorero bajya gutanga ubufasha ku bakene, abarwaye, impfubyi n’abapfakazi.

Abenshi babasura babashyiriye ibiribwa, ibikoresho by’isuku cyangwa ubufasha mu kwivuza nka mituweli n’ibindi.

Ugarukiye aha iki gikorwa bakora ni cyiza ariko birababaje gukora icyiza ukakigerekaho ikibi kizasiga amateka mabi kigatera igikomere n’ipfunwe abazakomoka ku bo wafashije.

Gufasha ni byiza ariko bitanga isura mbi iyo ababikoze bitwaje itangazamakuru bakagerekaho gushirya abo bafashije ku karubanda, bagafotora ibiryo n’abo babihaye kuva bivuye mu modoka, byinjira mu nzu kugera bitetswe bikajya mu gifu.

- Ese iyi migirire iterwa n’iki?

Abantu benshi bafite ibirarane byo kubahwa, guhabwa agaciro bitewe n’imiryango bavukamo cyangwa uko sosiyete yabafashe, aba iyo bagize aho bagera bishakira icyubahiro no kumenyekana bityo ibyo bakora byose bifuza kubyubahirwa, batanga ikiguzi cyose cyatuma bagera kuri iyo ntego nubwo babyitirira gufasha.

Abakirisitu bo n’abanyamadini iyo bakoze ibyo babyita umurimo w’Imana ariko mu by’ukuri ntabwo ariwo ahubwo ni ukwivura ibikomere by’amateka banyuzemo. Burya impamvu idutera gukora ibyo dukora iruta cyane ibyo dukora ubwabyo.

- Ese muri ibi bikorwa harimo ubumuntu?

Igisubizo cyanjye kiroroshye, ni oya. Umuntu w’impfura, warezwe kandi ufite indangagaciro, yewe niyo ataba umukirisitu ntiyatinyuka gushyira ku karubanda abo yagaburiye cyangwa abakene yafashije.

Abantu benshi bakomotse ahantu habi ndetse u Rwanda rwahuriyemo abantu bafite amateka avangavanze, bamwe babaye impunzi imyaka myinshi abandi bahunze igihe gito, abandi bavuka mu miryango ikennye, abize bigoranye n’ibindi.

Kuba waranyuze aho hose ntibibuza kwiyubaha no kubaha bagenzi bawe, iyo warezwe ugahabwa indangagaciro nzima kuko kuvukira mu buzima bubabaje si amahitamo yawe ntabwo ukwiriye kuzishyura ikiguzi cyabyo ubuzima bwose, igihe wowe n’abazagukomokaho uzaba ureba amafoto n’amashusho ari ku karubanda.

Itangazamakuru ni ryiza ridufasha muri byinshi ariko tunibuke ko abarikoramo bazi kubika ibyo bakoze ku buryo nyuma y’imyaka mirongo itatu umwana w’umwe mu bafashijwe nagirwa Ministiri abanyamakuru bazagarura agafoto ka se apfukamye ashimira umuterankunga wamuhaye umufuka wa kawunga n’umuceri. Ese bizamuhesha ishema cyangwa bizamuzanira ipfunwe we n’umuryango we?

Ikibazo mbaza abajya gufasha bakitwaza itangazamakuru, ese abaye ari so, nyoko, bashiki cyangwa basaza bawe bakaba babayeho ubuzima bubi bw’ubukene wakwishimira ko babagaburira bitwaje itangazamakuru bagashyira amafoto n’amashusho yabo ku karubanda?

Ku bemera Bibiliya Yesu yaravuze ngo ukuboko kw’iburyo nigukora ikintu ukw’ibumoso ntikuzabimenye. Nonese ibibitse kuri Google n’ahandi byatangarijwe Isi yose ubwo bizagarukira he?

Nsoza nagira inama abanyamadini n’amatorero n’abantu ku giti cyabo bifuza gufasha abakene; gufasha ni igikorwa cyiza ariko banza urebe impamvu igutera kubikora, hanyuma urebe niba birimo ubumuntu, unatekereze ku mutekano w’abo ugiye kugaburira niba bitazabasigira igikomere cy’iteka ryose kandi wowe wari uzi ko ugize neza.

Pastor Desire Habyarimana

Ibitekerezo (12)

Elie

29-12-2020    08:03

Babyita kurya hit, cg gushaka views, ese niba umuntu yari afite ibyo bikomere byimibereho akaba ashaka nicyo cyubahiro na views ni ngombwa ko yifotoreza kuwo yafashije, oya rwose nibasigeho, basi bajye bafotora ibyo bagiye gutanga banabyifotorezeho ariko ntibakavuge cg ngo berekane uwo babihaye, niyo nama nabagira

Clemence Ishimwe

29-12-2020    07:55

Nukuri mwijambo rimwe ibyo bakora sibyo.kd nsigaye mbona aribyo biharawe kd abeshi babonamo inyungu bitwaje kubabara kwabandi.birababaje cyane.

Eugène MUHIRE

29-12-2020    04:56

Pasteur urakoze. Byose wabisobanuye neza nanjye mbibona nko kwishakira ucyubahiro! Ahanini babikora ngo kubw’impamvu mwavuze haruguru ariko sibyo bikwiriye ndibwira! Ni ugukomeza gufasha muguhugura bo gukomeza kubikora kubwo kwigaragaza, kumenyekana no kwishakira icyubahiro ahubwo kubw’umutima wogufasha mwiza no kubw’icyubahiro cya Ndiho. Imana iguhe umugisha kubwo kurebera ibintu mukuri n’inama nziza .

Tito

28-12-2020    20:31

Hari umuntu itangazamakuru ritemberera, bigatuma ISI yose imenya ikibazo cye. Bagatanga n umurongo wa telephone abashaka gufasha bakoresha. Ugasanga bibaye igikorwa rusange nk umuganda. Maze ryatangazamakuru rikanatangaza uko ubwitange buri gukorwa. Ibi bikanakangurira abandi gutanga. Ntekereze ko NTA kibazo iyo biri rusange. Ariko iyo Ari igikorwa cyawe bwite, wigitangaza.

Munyurangabo Theoneste

28-12-2020    19:06

Ino conclusion niyo rwose Imana iguhe umugisha

Isaac

28-12-2020    18:11

Mubyo ukuri icyi kigisho ni ukuri ntabwo bikwiye gufasha umuntu ngo nurangiza umushyire kukarubanda.

Hari igihe uwo muntu nawe Imana imutera iteka agakomera bityo nawe akajya aterwa ipfunwe no kubona iyo mafoto ye Ari kukarubanda(Google) Kandi atabasha kuyakuraho. Muri macye aba ari ukutubahana no kudaha mugenzi wawe agaciri. Ntitukagirire neza kwishimisha ahubwo byose tubikorere kubaha Imana.

Murakoze

NGOGA

28-12-2020    17:40

Hari umuntu wavuzeko tuzahemberwa impamvu twakoze kuruta icyo twakoze ubwacyo! Ntekerezako ari nayo mpamvu imirimo izanyuzwa mu muriro...
(1 abakorinto 3:13).

Job

28-12-2020    17:27

Imana ibabarire ababikorana umutima ufite intego itari nziza kuko ntibikwiriye ko byagenda gutyo

David

28-12-2020    16:47

Pastor,Imana iguhe umugisha n,ubwenge bwokukomeza guhugura ,kuko ariyo mpanvu uri umushumba.ndakushimiye cyaaane kandi Data abane nawe.Merci et meilleurs voeux de l,an 2021.

Iraguha Faustin

28-12-2020    16:28

rwose ntabwo aribyiza nanjye njya mbyibaza, kuko abenshi twatatiye ijambo rivuga ngo ukuboko kwawe kwiburyo nigutanga ukwibumoso ntikukabimenye, bishatse kuvuga ngo kugira neza sukubigira itangazo. Ahubwo twagakwiriye kureka bikamenywa na Data watwese, kubwanjye rero najye ndabigaya pe bibyita kwibonekeza.

Paji: 1 | 2  

Tanga igitekerezo

Amategeko n'amabwiriza arakurikizwa

Haba hari icyemezo ufashe nyuma y'ubu butumwa ?