Ese habaho icyaha Imana itababarira umuntu?

Abantu bamwe bakunze kugira urujijo ugasanga bavuga ko ibyaha byose bingana imbere y’Imana. Mu gihe abandi banyuranya nabo bakavuga ko ibyaha bitangana, ko hari ibibabarirwa hakaba n’ibyo wakora ntubone imbabazi. Ukuri kwa Bibiliya niko gutanga igisubizo kizima.

Yesu yaravuze ati: “ndababwira ukuri yuko abantu bazababarirwa ibyaha byabo byose, n’ibitutsi batuka Imana, ariko umuntu wese utuka umwuka wera ntabwo azabibabarirwa rwose, ahubwo aba akoze icyaha cy’iteka ryose.” (Mariko 3: 28-29)

Abakristo benshi basanga abigisha b’ijambo ry’Imana bagambiriye kubabaza ibijyanye n’icyaha kitababarirwa kugirango bumve niba nabo ari cyo bakoze. Abizera benshi bibaza ubwabo niba barakoze ibyaha bitababarirwa.

Ntibitangaje kuba abantu barwana n’iki kibazo kuko usanga abantu bamwe mu itorero bajya impaka bavuga ko icyaha kitababarirwa ari ubwicanyi mu gihe abandi bavuga ko ari ubusambanyi, bitewe n’uko babona ko ibi byaha bifite ingaruka zikomeye ku muntu ndetse no ku muryango mugari. Ariko ndahamya ko muri ibi byaha byombi nta na kimwe kitababarirwa kuko hari ababikoze barababarirwa.

Rekatuvuge ku mwami Dawidi wakoze ibi byaha byombi, yarasambanye ndetse arica ariko nyuma yo kumenya ko yakoze nabi yagize umubabaro mwinshi atakambira Imana iramubabarira. Twibuke Yesu igihe yavugaga ku cyaha kitababarirwa, ubwicanyi n’ubusambanyi ntacyo yabivuzeho.

Ni gute umuntu asebya Umwuka Wera?

Mu butumwa bwiza bwanditswe na Matayo 12:32, Yesu yaravuze ati: “kandi umuntu wese usebya umwana w’umuntu azababarirwa, ariko usebya Umwuka Wera ntazababarirwa, naho haba mu ghe cya none cyangwa mu gihe kizaza.”
Aha igihe Yesu yavugaga umwana w’umuntu, niwe ubwe wivugaga. Mwibuke ko ubwo yabambwaga ku musaraba yasabiye abantu bose imbabazi ati: “data ubababarire”

Gusebya umwuka wera ni ukumutuka, kutamwubaha, gukora ibyangwa n’amaso y’Imana. Wakwibaza ibyo Imana yanga ibyo aribyo, soma (Abagalatiya 5: 19)

Abakristo nyakuri baba barahawe Umwuka Wera ubayobora mu rugendo rujya mu ijuru, umwuka wera yigisha abantu kureka gukurikiza ibyo kamere ishaka, ahubwo bakamvira Imana. Umuntu ukijijwe neza rero ntashobora gutuka Umwuka Wera ari cyo cyaha kitababarirwa.

Ni byiza rero ko abantu bareka kugira impungenge ngo bakoze ibibi bitababarirwa kuko tubonye ko Imana ibabarira ibyaha byose uretse abatuka Umwuka Wera. Kandi twabonye ko umuntu utuka Umwuka Wera ni utayoborwa nawo, duharanire kuyoborwa n’umwuka wera nibwo tutazakora ibyo kamere ishaka.

Source: Desiring God.org