Ev. Kwizera yakoze ubukwe na mukuru w’umugore we witabye Imana

Umuvugabutumwa Kwizera Emmanuel ukorera ivugabutumwa mu Itorero Evangelical Restoration Church (ERC) wanashinze umuryango ’ La kunda foundation’ ufasha abana bakennye, we na Coco Kaligirwa uvukana n’umugore we wa mbere witabye Imana basezeranye kubana akaramata nk’umugabo n’umugore.

Ubukwe bw’aba bombi bwari buteganyijwe tariki 21 Werurwe 2020, ariko buza gusubikwa kubera icyorezo cya Coronavirus cyugarije Isi.

Ku wa 25 Nyakanga 2020 nibwo basubukuye ibirori by’ubukwe bwabo. Ni umuhango wari urimo abakozi b’Imana batandukanye, babutashye bubahirije amabwiriza yo kwirinda Coronavirus.

Mu bukwe bwa Kwizera Emmanuel na Coco Kaligirwa, umuhanzi Patient Bizimana, ni we wayoboye umwanya wo kuramya no guhimbaza Imana.Ubwo umuvugabutumwa Kwizera Emmanuel yambikaga impeta Coco Kaligirwa; uyu mugore yasutse amarira.

Mu magambo yamubwiye hari aho yagize ati “Coco wambereye inshuti nziza, wambereye inshuti magara, naragukunze, ndagukunda kandi nzakomeza kugukunda. Ubushize muri Bridal Shower, nakubwiye ko nzaba umuvugabutumwa uzagukundwakaza.”

Coco Kaligirwa na we yabwiye umugabo we ko azamuba hafi mu bihe byose kandi akazamukunda akamukundwakaza. Amushimira ko yamuteje indi ntambwe ‘akava ku kuba mushiki we, agahinduka umugore’.

Aba bombi tariki 29 Ukuboza 2019 nibwo baranzwe mu rusengero rwa ERC Kimisagara na Pasiteri Aron Ruhimbya wabasabiye umugisha no guhirwa mu rugendo rwo kubaka umuryango mushya.

Uyu muhango wabaye nyuma yaho mu ntangiriro z’Ugushyingo 2019, Ev. Kwizera yambitse impeta Kaligirwa amusaba ko barushinga undi nawe nta gushidikanya aramwemerera.Kaligirwa ni mukuru w’umugore wa Kwizera ndetse ni we wasigaye yita ku bana batatu Kunda yabyaranye na Kwizera.

Kunda yitabye Imana tariki ya 6 Kanama 2017, azize indwara ya kanseri y’umwijima yari amaranye amezi atanu. Yaguye mu Bitaro byitiriwe Umwami Faisal aho yari amaze icyumweru arwariye. Abasenganye n’abakoranye na we bamufataga nk’inkoramutima ndetse bamushima ubutwari bwamuranze no kwicisha bugufi yagiraga imbere y’abantu bose.

Ku wa 5 Kanama 2018 mu rusengero rwa Restoration Church Kimisagara ubwo hibukwaga umwaka Kunda amaze yitabye Imana, Umuvugabutumwa Kwizera yatangaje ko yatangije umuryango ‘La Kunda Foundation’ ugamije gushyigikira ibikorwa byiza byaranze umugore we.Uyu muryango wibanda ku gufasha abana bakennye kurusha abandi kwiga, gufasha abashakanye kubaka ingo zabo neza no gukora amasengesho yo gusengera ibihugu bitarageramo ubutumwa bwiza.

Kwizera Emmanuel akorera umurimo w’Imana mu Muryango Nyafurika w’Ivugabutumwa (AEE) muri Kenya. Yamenyekanye cyane mu murimo w’Imana kuva akiri muri Kaminuza y’u Rwanda i Butare, ari naho yakiriye Yesu nk’Umwami n’Umukiza we.

Umuvugabutumwa Kwizera Emmanuel na Coco Kaligirwa basezeranye kubana akaramata nk’umugabo n’umugore

Umugore we wa mbere Kunda yatabarutse afite imyaka 37, yamusigiye

abana batatu barimo abakobwa babiri n’umuhungu umwe.

Daniel@Agakiza

Source: Igihe