Gerageza ube umunyakuri: Ese ukunda Imana(...)

Kwamamaza

agakiza

Gerageza ube umunyakuri: Ese ukunda Imana cyangwa wikundira mu Mana?


Yanditswe na: Ubwanditsi     2021-01-08 07:56:17


Gerageza ube umunyakuri: Ese ukunda Imana cyangwa wikundira mu Mana?

Gukundisha Imana umutima wose n’ubwenge n’imbaraga, gukunda mugenzi wawe, uworoheje hanyuma y’abandi nkuko wikunda, gukunda umwanzi wawe n’ugukunda gupfira abandi ni inzego z’urukundo. Ukwiye kuba warazigezeho niba koko ufite urukundo.

“Kuko yankunze akaramata ni cyo nzamukiriza, Nzamushyira hejuru kuko yamenye izina ryanjye. Azanyambaza nanjye mwitabe, Nzabana na we mu makuba no mu byago, Nzamukiza muhe icyubahiro. Nzamuhaza uburame, Kandi nzamwereka agakiza kanjye." Zaburi 91: 14-16.

Mu nyigisho zabanje twavuze ko Uwiteka yatwemereye kutubera ubwihisho, tuvuga uko ubwihisho bwabonetse kuva mu itangiriro kugeza mu Byahishuwe. Mu nyigisho ya 2 yakurikiyeho twaboneye hamwe ibyo Uwiteka akwiye kuduhisha. Igice cya 3 cyaravugaga ngo ‘Uwo washyizemo ibyiringiro ni we uzaguhisha ku munsi w’amakuba’.

Uyu munsi, turagaruka ku mukoro dusanga muri iyi nyigisho igaruka ku nzego 4 z’urukundo Imana itwifuzaho. Twabiteguriwe na Pasiteri Habyarima Desire mu kiganiro ‘Ubutumwa bukiza’ kinyura kuri Agakiza Tv.

“Kuko yankunze akaramata ni cyo nzamukiriza”

Mubyukuri hari amasezerano atagira na kimwe asaba. Imana igusha imvura ku babi n’abeza, ipfumbatura igipfunsi igahaza kwifuza kw’abariho bose. Ibyo ibikora ntacyo ibanje gusaba abantu, ariko hariho amasezerano y’umwihariko ku bana b’Imana. Aho Bibiliya ikubwira ngo ’Nukora iki, nanjye nzakora iki’, ibi wabibonera mu gitabo Gutegeka kwa kabiri 28:28, aho havuga imigisha izaba ku bisiraheli kandi n’imivumo izaba ku bantu batazumvira Imana.

Imana niguha isezerano rya rusange ni byiza, ariko niguha isezerano ry’umwihariko ni ikitonderwa!. Biba bisaba kumenya icyo ukwiye gukora, kandi ukagikora kugira ngo uwo mugisha ukuzeho utazagira umuvumo. Imana ifite byinshi byo kudukorera kandi byiza, ariko hari igihe idusaba icyo natwe dukwiriye gukora. Ibyo Imana idusaba byose birashoboka ntabwo yatwikoreza imitwaro tudashobora.

Ibyo Bibiliya ivuga byose birashoboka kandi naje gusanga ari inyungu zacu: Iyo ikubwiye ngo ntugasambane iba ikurinze Sida, ikurinze kwandura ibirwara bitandukanye. Iyo ikubwiye ngo ntukanywe itabi, iba ikurinze igituntu n’ibindi byinshi. Iyo Imana itubujije gukora ibyaha, ntabwo ari inyungu zayo bwa mbere ahubwo ni inyungu zacu.

Muri iyi zaburi ya 91:1-13, tubonamo ko ibyo Imana idukorera aribyo byinshi ariko ikadusaba ikintu kimwe gusa, ‘Kuyikunda’.

Abantu benshi ntibakunda Imana ahubwo bo bikundira mu Mana. Dufashe urugero, igihe abantu bazaga kuri Yesu ngo abahe imigati yarayibahaye kuko bahita bajya no kuzana abandi basize mu rugo.

Hnyuma Yesu ngo arabagerageza abishaka, arababwira ngo ‘Uyu munsi nta migati ihari, ni njye mutsima w’ubugingo’ urya uyu mutsima akanywa amaraso yanjye azabaho iteka ryose, kandi azakizwa’. Bibiliya iravuga ngo ‘Bamuvaho bamusiga mu butayu’. Kubera iki ?, kubera ko yarababwiye ibyo batamenyereye.

Hari igihe tubana na Yesu tumushakaho ibitangaza, ariko tutarashaka Imana ikora ibitangaza. Abantu benshi ntabwo bakunda Imana ahubwo bakunda imigati ibaha, bakunda ibitangaza ibakorera, bagakunda ibyo bayikuraho kuruta uko bayikundisha umutima wose.

Ese Yesu waba umukunda ukareba Filime amasaha 6 utabasha gusenga iminota 30?, waba umukunda ukabura umwanya wo gusoma Bibiliya Yera?. Waba umukundisha umutima wose n’ubwenge n’imbaraga ukananirwa gukora ibyo igusaba gukora?, Oya ntabwo uyikunda ahubwo wikundira muri yo.

“Kuko yankunze akaramata ni cyo nzamukiriza”

Ese hari ikintu wazana imbere y’Imana ukavuga uti" Mana mubyukuri iki ni cyo wankiriza?". Erega hari igihe biba ngombwa ko umuntu yibutsa Imana imirimo. Urugero rwiza ni urwa Tabita utarazuwe n’amarira y’abapfakazi ahubwo wazuwe n’imirimo yasize akoze.

Urwego rwa 1 rw’urukundo: Gukundisha Imana umutima wose

Ese byashoboka ko ukunda Imana ukayima amafaranga?. Hari abantu bajya bajya impaka ngo gutanga icyacumi, ngitange cyangwa mbireke!.

Ese waba warahaye Imana umutima ukayima amafaranga, ukayima ubutunzi bwawe? Ibyo ntibabiguhatira. Ese koko ukunda Imana? Ukabura umwanya wo gusenga, ukabura umwanya wo gusoma Bibiliya, ukabura umwanya wo gukora imirimo myiza?. Ukabura umwanya wo kujya ahera h’Imana?, ntibibaho ntuyikunda.

Wasoma kandi n’iyi nyigisho, ibisobanuro by’imbitse ku gukunda Imana: Harya ukunda Imana?, Bisobanuye iki gukundisha Imana umutima wawe wose?

https://www.agakiza.org/Harya-ukunda-Imana-Bisobanuye-iki-gukundisha-Imana-umutima-wawe-wose.html

Urwego rwa 2 rw’urukundo: Gukunda mugenzi wawe nk’uko wiknda

Gukunda mugenzi wawe nk’uko wikunda, ni kamere y’Imana Data. “Kuko yakunze abari mu isi cyane byatumye itanga umwana wayo ari ikinege”. Yadukunze turi babi.

Ukwiye gukunda bose atari uwo munganya ubushobozi. Hari abantu babana kuko bubatse amazu asa, kuko bose biganye, bacuruza hamwe kuko bafite urwego rw’ubuzima bumeze kimwe.

Ariko ibyo sibyo mubyukuri!, Yesu yaravuze ngo ’Ubwo mwabikoreraga uworoheje hanyuma y’abandi, ninjye mwabikoreye’. Nusura umuntu kuko yabyaye ko nawe azagusura wabyaye, ni wowe uba wisuye. Azabikwitura, ntacyo uba ukoze mu Bwami bw’Imana. Nugaburira abo munganya ubushobozi nabo bazakugaburira ubutaha, uba ubagurije bazakwishyura.

Ariko iyo ubihaye umuntu woroheje, wa muntu utatinyuka no kugera iwawe uba ubikije mu bwami bw’Imana.

Bisobanuye iki gukunda mugenzi wawe nkuko wikunda?

Kwigurira Fanta unyotewe, ukibuka ko hari undi muntu unyotewe. Ni ukwigurira umwenda, ukibuka ko hari n’undi muntu wambaye ubusa. Ni uguhirimbana ngo ubone aho uba, ukibuka ko hari n’undi muntu utagira aho aba.

Urwego rwa 3 rw’urukundo: Ni ugukunda abanzi bawe

Yesu yavuze ko tudakwiye gukunda abadukunda kuko ibyo n’abapagani babikora. Ahubwo umwanzi wawe nasonza umugaurire, nagira inyota umuhe icyo anywa uzaba umurunzeho amakara yaka( uzaba umuzanyeho impinduka).

Nkubaze, niba warananiwe gukundisha Imana umutima wawe wose, ukananirwa gukunda mugenzi wawe ubwo uzakunda umwanzi wawe?

Urwego rwa 4 rw’urukundo: Gupfira abandi

“Kuko Imana yakunze abari mu isi cyane, byatumye itanga umwana wayo w’ikinege kugira ngo umwizera wese atarimbuka, ahubwo ahabwe ubugingo buhoraho”. Yohana 3:16

“Iki ni cyo kitumenyesha urukundo icyo ari cyo , ni uko Yesu yatanze ubugingo bwe ku bwacu. Natwe ikidukwiriye ni uko twatanga ubugingo bwacu ku bwa bene Data”. 1Yohana3:16

Kugira ngo ubutumwa bwiza butugereho kandi bukomeze bugende, ni uko hari abantu batanze ubuzima bwabo. None twe turubaka ubwami kugira ngo twemeze abandi, ugasanga umuntu yubatse urusengero ruteye ubwoba wareba muri urwo rusengero ugasanga nta mumisiyoneri urimo. Ugasanga ntawakwemera kwitangira abandi, ntawakwemera kujyana ubutumwa bwiza mu bandi.

Kubera iki tutashyigikira abantu bajyana ubutumwa bwiza kandi ko nta na kimwe twabuze?. Nta na kimwe Imana yatwimye ahubwo turikunda, dufite umutima utagutse wakwirwamo abandi!. Dukwiye kuba turi abantu babwiriza ubutumwa bwiza, tugashyigikira uburyo bwose bukoreshwa kugira ngo ubutumwa bwiza bubwirizwe.

Ukwiye gukoresha inzira zawe yose, ugakoresha umutungo Imana yaguhaye, ugakoresha indimi Imana yaguhaye kumenya. Ugakoresha uburyo bwose ukagira umutima wagutse ukwiramo abandi ubutumwa bwiza bukabwirizwa.

Mu nyigisho y’ubutaha tuzavuga ku masezerano 7 y’umwihariko ku bantu bakunda Imana.

Reba hano iyi nyigisho yose

Source: Agakiza.org

Daniel@Agakiza.org

Ibitekerezo (0)

Tanga igitekerezo

Amategeko n'amabwiriza arakurikizwa

Haba hari icyemezo ufashe nyuma y'ubu butumwa ?