Gusubizwamo Imbaraga kubwo kuramya Imana/ Rev Antoine RUTAYISIRE

Abakirisito ntabwo bajya bafata umwanya batekereze yuko iyi nzira bagendamo, ari inzira imeze nkuko Abayisirayeli bagendaga bavuye muri Egiputa bajya mu gihugu cy’amasezerano kandi bamaze imyaka mirongo ine mu butayu. Urugendo abasirayeli bakoze ni igishushanyo cy’urugendo rwacu. Icyabasubizagamo imbaraga natwe nicyo kizadusubizamo imbaraga.Ikibazo rero abakirisito benshi baragiye ariko ntibaragera aho bajya, baragiye baracumbika.


Abantu benshi iyo bakijijwe barakizwa bakihana ibyaha bimwe gusa yageza hagati agaparika aho , akavugango ariko njyewe sinywa inzoga, sinywa itabi, sinjya nsambana nageze iyo njya, oya nturagerayo. Buri mukirisito wese akenera gusubizwamo imbaraga kuko urugendo ni rurerure. Eliya yigeze gucika intege aragenda ahungira ku musozi wa Horebu, yicara munsi y’igiti cy’umurotemu yisabira gupfa, Imana yohereza marayika aramugaburira, ararya arangije arongera ariryamira arasinzira bikubwirango nta mbaraga zari zasubiyemo ariko Imana ibwira marayika ngo subirayo wongere umugaburire, marayika araza aramubwirango Eliya byuka wongere urye, ngo ararya avanamo imbaraga iryo bondo yarigendeye iminsi mirongo ine, agera i Horebu ku musozi w’Imana. Iteka ryose dukenera gusubizwamo imbaraga.

Igihindura ibintu byose ni aho Imana ihagaze, iyo Ezekiyeli ahagarara mu kibaya cy’amagufwa yumye wenyinye ntiyari kuhivana. Ubuzima ntibujya burangwa no kwiheba iyo amaso uyerekeje ku Mana. Twese hari ubwo tuzahagarara mu kibaya cy’amagufwa yumye , uzakubeshya ngo iyo ukijijwe Imana igenda iguteruyeee, hari igihe igushyira hasi ukigenza, Ikakubwirango nzagendana nawe ariko ni wowe uzigenza, uburyo Imana idutwara ntabwo itugira bajeyi. Hari igihe abantu bakubeshya ngo iyo ukijijwe ntabwo ubabara, ntabwo uhura n’ibibazo, abakwanze baragukunda, ibintu byose bigenda neza, ntabwo ariko Imana ibigenza ahubwo iravugango amakuba y’umukiranutsi azaba menshi ariko yose Uwiteka azayamukuramo.

Ni iki kizadusubizamo imbaraga mu makuba ?

1. Ijambo ry’iby’Imana yavuze
2. Gusenga ugahoza amaso ku Mana
3. Kuguma mu mwuka
4. Kugira icyerekezo cyo gukorera Imana

Hari ubwo umuntu aza akambwirango rwose Pasita Imana iguhe umugisha, ikurinde nkamubwirango izabikora kuko ibifitemo inyungu. Uzafate ubuzima bwawe ubwegurire Yesu.

Nkiri umusore maze gukizwa nafashe urupapuro nandikira Imana, “urumva rero mwami Yesu, nyuma yo gutekereza kubyo wankoreye, ndagirango dusezerane ibi ngibi, ubuzima bwanjye bwose warakoze kumbabarira ibyaha nakoze nkiri mu bujiji none guhera uyu munsi mfashe icyemezo: Nzajya aho ushaka, nkore ibyo ushaka , mbikore uko umbwiye kugeza igihe uzagarukira ndasinya. Ubundi njya kubatizwa mu mazi menshi , ntamuntu wambwirije nari umukatolika nabwirijwe na Yesu uretseko hari abamfashije gukura. Nabwiye umupasiteri ngo ndashaka kubatizwa kandi mbere yo kubatizwa uzambabarire mbanze ntange ubuhamya, ntabwo nzabarambira nzavuga amagambo ane gusa, nzabwira Imana ngo: Mana warakoze kumbabarira kandi warakoze kunyereka Yesu, icya kabiri nzabwira satani ko nasezeye ntazagaruka , icya gatatu nzabwiranti ngo mumbere abahamya ko nabivuze mwumva, icya kane nzabwira umutima wanjye ubyemere ko ariko nzabaho, pasteri yarasetse arambwira ngo nzaze mbatizwe mvuge ayo magambo hanyuma arambatiza. Ubundi rero iyo wafashe ubugingo bwawe ukabuharira Yesu ujya umunyango afitemo inyungu zo kukurinda, jya umenyako akwitaho kuko yagushoyemo umushinga we, yagushyizemo igishoro gikomeye nta nyungu yagira aguhombe, ibyo uzanyuramo byose uzakomezwa n’Ijambo ry’Imana, uzakomezwa no gusenga Imana,uzakomezwa no kuzura umwuka , uzakomezwa no kwibukako iteka ryose Imana igufiteho umugambi kandi itazakureka mbere yuko iwusohoza.

Ikintu kizatuma ubuzima bwose n’imibereho ubayeho bitakugiraho imbaraga ni ikintu kitwa “kuramya”? Imana yaravuzengo nuca mu mazi ntazakutembana, nuca mu muriro ntuzashya kuko nzaba ndikumwe nawe. Ntarindi humure Imana iha abantu bayo uretse kubana nabo. Ntabwo Imana yigeze ivugako tutazahura n’inzara n’inyota cyangwa intambara, urupfu n’indwara icyo yavuze ni kimwe “Nzabana nawe”

Reka dusome ijambo ry’Imana, 2 samweli 6:4… ”Nuko barikura mu rugo rwa Abinadabu rwo ku musozi ririho isanduku y’Imana, Ahiyo ayigiye imbere. Dawidi n’umuryango wa Isirayeli wose biyerekera imbere y’Uwiteka, bacurangisha ibintu by’imiberoshi by’uburyo bwose, n’inanga na nebelu n’amashako, n’ibinyuguri n’ibyuma bivuga” “Nuko byagenze bitya: abahetse isanduku y’Uwiteka batambutse intambwe esheshatu, ahatambira impfizi n’ikimasa cy’umushishe. Maze Dawidi yiyerekera imbere y’Uwiteka aca ikibungo, kandi yari yambaye efodi y’igitare. Dawidi n’umuryango wa Isirayeli wose bazamura isanduku y’Uwiteka, biyamirira bavuza amakondera.”

Ndagirango tuvuge kuramya Imana ni iki? Iyo tuvuze icyubahiro cy’Uwiteka, muri Bibiliya uzasanga ikibazo cyagiye kiba hagati y’Imana n’ubwoko bwayo, uzasanga ari icyubahiro cy’Uwiteka. Imana mu buryo butandukanye yagiye irema ibintu bituma icyubahiro cyayo kigaragarira abantu bose bumwe muri ubwo buryo ni ibiremwa yaremye. Ibyo Imana yaremye byose byamamaza icyubahiro cy’Uwiteka. Dawidi yabivuze neza muri Zaburi 8:4-5 “Iyo nitegereje ijuru, umurimo w’intoki zawe, N’ukwezi n’inyenyeri, ibyo waremye, 5 Umuntu ni iki ko umwibuka, Cyangwa umwana w’umuntu ko umugenderera? ” Ariko kenshi ntabwo abantu bibwiriza barebe ibyo, Imana yagiye ishyiraho ibintu byo kutwibutsa icyubahiro cyayo.

Isanduku y’Uwiteka Abafilisitiya bayinyaze biturutse ku byaha bya bene Eli, Hofuni na Finehasi bakoreraga ibyangwa n’amaso y’Uwiteka mu rusengero kuko basambanyaga abagore bakoraga mu rusengero. Ubwo Abisirayeli bajyaga kurwana, abafilisitiya babonye isanduku y’Uwiteka bashya ubwoba, baratinya ati ya Mana ifite amaboko akomeye turayikizwa ni iki? Ko ari hagati mu bisirayeli ariko mureke turwane nk’abagabo. Icyo gihe Abisirayeli ntibamenyeko Imana yabakuyeho amaboko kubera ibyaha by’abatambyi babo. Abafilisitiya baraje barabakubita, Hofuni na Finehasi barapfa n’ingabo za isirayeli ziratatana. Isanduku isigara aho abafirisitiya barayitwara, bayigejeje iwabo bayishyira mu nzu y’ikirwamana cyabo dagoni bukeye mu gitondo basanga dagoni yibwirije yaciye bugufi imbere y’Imana, iraramya, iyo Imana yaje za dagoni zica bugufi. Baravugana bati buriya ni umuyaga wayihushye ,umva imana ihuhwa n’umuyaga, barayiterura bayisubiza ku gitereko cyayo, Imana iravuga ngo Njyewe nanga agasuzuguro,ifata dagoni iyica umutwe n’amaboko noneho iyijugunya hanze, baraza basanga aho binjirira mu rusengero rwa dagoni, dagoni iri hanze Imana isigaramo yonyine. Uwo munsi Imana yahise ibateza n’indwara hirya no hino, bigeze aho baravugana bati iyi mana ya Isirayeli ishobora kwirwanirira twatsinze isirayeli ariko ntitwatsinze Imana yabo, nimuyireke itahe.

Hano isomo dukuramo dukwiye kumenya ko Imana ari Imana kandi itura hagati muri twe kugirango iturinde no kugirango idutunge. Iyo Imana yaje hagati muri twe imbaraga ziraza, ubwenge buraza,kunesha biraza,gukomera biraza. Imana niyo mugaba wacu niyo iturinda.

Kuramya ntabwo ari ukuririmba,gerageza nuririmba uririmbe nkuri kubona Imana, uririmbe nk’uyibwira. Kuko hari igihe ushobora kuririmba nawe ubwawe Imana ntayo wabonye ,uririmba gusa kuberako indirimbo iryoshye. Bizakubaka, bizagukomeza umunsi uzaririmba ukajya wumva amagambo y’Imana, ukumva ibyo uririmba wahindutse byo, ukumva ibyo uririmba ni byabindi ubaho. Ibintu bitangira kuryoha iyo Imana yatangiye kukuryohera.

Iriya sanduka ni igishushanyo cy’icyubahiro cy’Imana. Dawidi yayigaruye muri Isirayeli ariko twe uno munsi , Imana ishaka gutura muri twe tukagendana nayo. Imana ishaka kugaruka ikaba hagati mubyo tubamo, mu byo dukora, mu byo tunyuramo. Ukavugango ibi nzabinyuramo mperekejwe n’Uwiteka. Kuko muri kiriya gihe Isirayeli yari ikikijwe n’abanzi benshi Dawidi aravugango ikizadukiza, reka tuzane Uwiteka aze ature hagati muri twe, nicyo yabanjirijeho.

Witeguye kuzana Imana ikaba iya mbere mubuzima bwawe ? witeguye kubaha Imana ukagenda nkuko ivuga ? Aho gushaka kurya imigisha y’Uwiteka ariko utubahirije amategeko ye! Kuko mu isanduku y’Uwiteka harimo Manu ishushanya imigisha yose duhabwa ariko harimo n’amategeko icumi ashushanya kumvira Uwiteka. Hari abantu bashaka kurya umugisha ariko batumvira, hari n’abantu bumvira ariko bataziko Imana itanga umugisha.

Ismael@Agakiza.org