Ni irihe somo dukura ku bantu bagiye barekeshwa ibyabo no gushaka Imana ?

Imana niyo irema ubuzima ikabukomeza, Yesu ubwe yigeze avugako kwiganyira kwa muntu kudashobora kumwongera na mukono umwe. Iyi nkuru ntishishikariza abantu kuba inyanda ntibakore kuko Bibiliya ubwayo yemezako uwakoze ariwe ukwiye kurya ariko na none ntidukwiye kwihugiraho ngo dukunde dutunge iby’isi.

Impamvu ni uko hari abantu bageze k’urugero rwo gushaka ubutunzi kandi bitwa abakirisito kugera ku kigero cyo kwiba n’ibintu byo munzu y’Imana, bakiba ubutunzi bashinzwe gucunga. Nyamara twibukeko ubwami bw’Imana bwagurwa n’ubusabane umuntu afitanye n’Imana kandi ni naho hava uburinzi. Bibiliya igararagaza abami benshi bari abakire ariko badatunze Imana bajya ku rugamba bakagwayo kandi bafite ingabo zikomeye. Hari n’abandi bagiye batakira Imana nta ngabo bafite Imana ikabarwanira, Uziko hari aho Imana yagiye ikoresha amavubi kugirango irengere abantu bayo!

Reka dufatire urugero ku ntumwa cumi n’ebyiri za Yesu, abahoze ari abarobyi ,abandi ari abakoresha b’ikoro , Turareba n’abandi bake Bibiliya igaragaza bahisemo kubana n’Imana babanje kwitarutsa ubutunzi bw’isi.

1.Andereya: Abarobyi benshi bahoraga ku nyanja bakora amato yabo banamesa inshundura barobeshaga, na Andereya yahamagawe na Yesu arimo akora ibyo, (Luka 5:2).

2.Yakobo n’umuvandimwe we Yohana Aba ni bene Zebedayo ntabwo bari abarobyi nk’abandi ahubwo bo bari bafite amato bakoreshagamo abandi bakozi, (Luka 5:2)

3.Matayo cyangwa Lewi: Yesu avayo, akigenda abona umuntu witwaga Matayo yicaye aho yakoresherezaga ikoro, aramubwira ati “nkurikira.” arahaguruka, aramukurikira. (Matayo 9:9). Matayo yari uwo mu muryango w’Abayuda usoresha, Amafaranga yabonaga yayabonaga muburyo twavugako butari bwiza gusoresha kwe byatumaga nta mpinduka zamugaragaraho. Abasoresha bangwaga na rubanda

4.Simoni Zerote: Yari umunyapolitike kimwe n’abandi kuko bari bafite ishyaka ryo kurwanya imiyoborere ya Roma ariko amaze kuba intumwa ya Yesu yagize ishyaka ryo kubaka ubwami bw’Imana bitandukanye nuko yiyumvaga mbere akigira ishyaka ryo kurwanira ubwoko bw’Abayuda. Filipo na Yokobo (bene Alufayo) na Yuda(Tadeyo) bari abacuruzi.

Intumwa zaje gusobanukirwa neza ko Imana izahaza kwifuza kwabo ari uko babanje gukora umurimo wayo w’ivugabutumwa “Abo cumi na babiri Yesu arabatuma abategeka ati “Ntimuzajye mu bapagani cyangwa mu midugudu y’Abasamariya, ahubwo mujye mu ntama zazimiye z’umuryango wa Isirayeli. Nimugende mwigisha muti ‘Ubwami bwo mu ijuru buri hafi.’ Mukize abarwayi, muzure abapfuye, mukize ababembe, mwirukane abadayimoni. Mwaherewe ubusa, namwe mujye mutangira ubundi. Ntimujyane izahabu cyangwa ifeza cyangwa amakuta mu mifuka yanyu, cyangwa imvumba y’urugendo cyangwa amakanzu abiri, cyangwa inkweto cyangwa inkoni, kuko umukozi akwiriye ibimutunga.” Matayo 10:5-10

Yesu amaze kohereza intumwa ze yazihaye imbaraga n’ubutware “Abo barasohoka bigisha hose, Umwami Yesu ari kumwe na bo abafasha, akomeresha ijambo rye ibimenyetso byagendanaga na ryo.”( Mariko 16:20)

5. Pawulo: Pawulo nawe ni umwe mubakoreye Imana cyane, nyuma yo guhinda kuba intumwa ya Yesu kristo ubwo yafatwaga n’umucyo w’Imana arimo ajya kurenganya ubwoko bw’Imana. Bibiliya itwerekako Pawulo yari afite umwuga wo kuboha amahema. (Ibyakozwe n’Intumwa18:2-3), Pawulo byageze aho avugako atekereza iby’isi nk’igihombo, ibyari indamu ye kubwo kuronka ubutunzi butagira akagero aribwo kumenya Yesu. (Abafilipi 3:7-8)

6.Zakayo: Yumvise ko Yesu ari butambuke, agira inyota yo kumenya Yesu ariko kuko yari mugufi yurira umuvumu, Bibiliya itubwirako Yesu yahageze ararama amenya ko hari uri kumushaka. Guhura na Yesu byatumye Zakayo yihana uburiganya yaramaranye igihe kinini kandi yemeye kwishyura iby’abandi yahuguje ubwikube kane(Luka 19:1-10)

7.Elisa: Yahamagawe n’umukozi w’Imana Eliya, uwo mwanya ahita asiga inka yarimo ahingisha akurikira Eliya. (1Abami 19:19-21) Ntiyakomeye ku mitungo yarafite ahubwo yibanze ku mbaraga ziri muwamuhamagaye kandi ku iherezo Elisa yaronkeye umugisha mwinshi kuri Eliya nubwo uwo mugisha utabarirwa mubigaragara ariko ufite icyo wunguye ubwami bw’Imana kuko mu bitangaza Elisa yakoze harimo kumenyekanisha Imana mu banyamahanga, Ubwo yakizaga umugaba w’ingabo zo muri Siriya arwaye ibibembe.

Ntabwo twabashije kuvuga abantu bose baboneka muri bibiliya bagiye basiga ibibatunga kandi bigaragara n’amaso y’umubiri kuko ni benshi gusa mu bake twavuze basize ibyabo bagiye bunguka ibindi bifite umumaro mu kwagura ubwami bw’Imana. Bibiliya iravugango, Imigani 8:17-19 “Nkunda abankunda, Kandi abanshakana umwete bazambona. Ubukire n’icyubahiro biri iwanjye, Kandi n’ubutunzi buhoraho, no gukiranuka na byo. Imbuto zanjye ziruta izahabu, ni ukuri ziruta izahabu nziza, Kandi indamu yanjye iruta ifeza y’indobanure.”

Igitangaje ni uko usanga muri iyi minsi abantu bafite urwitwazo rwo kudakorera Imana, nyamara ibyo abantu barwanira , usanga ari byo abo dukomokaho aribyo bagiye bata bigatuma bagirana umubano mwiza n’Imana. “Uziko iyo ushatse ibintu udafite Yesu ntabyo ubona niyo ubibonye nibiguhaza kandi niyo biguhagije ntibiramba”. Rimwe intumwa za Yesu zashatse kwisubira mu Nyanja kuroba kuko Yesu yari amaze kujya mu ijuru ariko baraye baroba bakesha ijoro ntacyo babonye gusa Yesu aje kuko ari umunyembabazi nyinshi ababwira aho baterera inshundura bajya bafata ifi nyinshi ijana na mirongo itanu neshanu(155), babona nizokeje ku makara batabigizemo uruhare, (Yohana 21:1-6). Umutima w’umuntu utekereza uregendo rwe ariko intamwe zarwo ziyoborwa n’Uwiteka.

Guhora uhanze amaso kuri wowe ubwawe ninko gufata inzira itagira aho ikujyana ariko guhanga amaso Uwiteka bikura umuntu mu mfunganwa bikamushyira ahagutse kandi bizana umudendezo.

Ismael@Agakiza.org