Nigute wasenga ugasubizwa?

Kandi iki nicyo kidutera gutinyuka imbere ye, nuko atwumva iyo dusabye ikintu nkuko ashaka. Kandi ubwo tuzi ko yumva icyo dusabye cyose, tuzi nuko duhawe ibyo tumusabye. (1Yohana:5,14-15)

Imana ntishaka ko tumara umwanya dusenga tutabona ibisubizo. Ishaka ko dusenga cyane (1 Abatesalonike 5:17; Luka 18: 1), ariko tukabona ibisubizo. Amasengesho adasubizwa rwose ntabwo anezeza Imana. Iyo umuntu yasubijwe ibyo yasengeye, nibyo binezeza Imana cyane. Nibyiza rero ko tugomba gukora ibituma Imana inezererwa ndetse bikayihesha icyubahiro.Niba rero dusenga kandi ntitubone ibisubizo hari ikintu kitari cyiza kiba cyabayeho haba mubyo dusengera, mu buryo dusenga, cyangwa n’uburyo imitima yacu iba imeze mugihe turimo gusenga. Wifuza gusenga ugasubizwa kandi ukabona impinduka ? nibyiza ko usobanukirwa ibi bikurikira.

Birasaba ko usenga

Abantu bamwe ndetse n’abakristo ntibasenga cyane. Yewe kuri bamwe ntibirirwa banashishikazwa nabyo cyane. Nubwo benshi bahitamo kuguma muri ubwo buzima, bakumva bibahagije kubaho badasenga, ariko ntushobora kubona igisubizo cy’icyo utasengeye.

Icyo Bibiliya ibivugaho

Ntimukagire icyo mwiganyira, ahubwo ibyo mushaka byose bimenywe n’ Imana. Nuko amahoro y’Imana ahebuje rwose, ayo umuntu yamenya azarindire imitima yanyu n’ibyo mwibwira muri Kristo Yesu" (Abafilipi 4: 6.7)

Aho rero guhangayikishwa n’ibintu, turasabwa kubisengera. Niyo ntangiriro.Yesu yashimangiye rwose ko Imana Data ishaka ko dusenga. Yaravuze ati: “Musabe muzahabwa ,mushake muzabona,mukomange muzakingurirwa (Matayo 7:7,8)

Tugomba gushimisha Imana nitwinjira muri ibi. Ariko turashaka kubona ibisubizo, kandi nibyo. Biragoye rero ko twanezeza Imana mugihe tutakoze ibi, niba koko dushaka gusubizwa mu masengesho yacu.

Nibyiza ko wemera kubabarira abakubabaje

Kandi nimuhagarara musenga hakaba hari umuntu wabagiriye nabi, mumubabarire kugira ngo so wo mu ijuru abababarire ibyaha byanyu (Mariko 11:25)
Kubabarira abandi ni ngombwa kugira ngo ubone ikintu icyo ari cyo cyose kiva ku Mana. Kutababarira niyo nzira idashidikanywaho yo guhagarika imigisha y’Imana. Ntibivuze ko uzizera ijana ku ijana abakugiriye nabi. Ariko ugomba kwirinda uburyo ubwo aribwo bwose bwazamo ikirego cy’indishyi z’abantu bagukoshereje. Ugomba kubasaba gukora neza, ariko nibabyanga, ubareke , kuko Imana ntizabura kubiguhera umugisha muri ibyo bihe uzaba urimo.

Girana ubusabane n’Imana, biciye mukuyiramya no kuyihimbaza,kandi umenye no gutegereza.

Urashaka gufasha umuntu wifuza kuvugana nawe mugihe haricyo umushakaho? Mu gusenga kwawe se ninde uba witayeho ni ibyo usengera cyangwa ni uwo usenga? Birakwiye ko wumvako uri umwana w’Imana Data, kandi ko nayo ari umubyeyi wawe. Iga uko waba inshuti y’Imana.Tugomba kwiga gusenga no kubaha Umwami mu bihe byacu byo gusenga.

Tugomba kumushimira kubyo amaze gukora. Byature rwose bwira Imana uko ikomeye. Ikindi ugerageze gufata umwanya wo gutegereza bucece imbere y’Imana wumve ko muri kumwe. Imana ikunda ibyo cyane, bikayinezeza kandi bikayitera no gukora! Bwira Imana ibyerekeye iminsi yawe yatambutse, uyifungurire umutima wawe kubyabaye byose, ibyiz ndetse n’ibibi. Ikindi umenye ko nubwo Imana ishaka ko tuyisaba, ariko nanone twibuke ko hariho byinshi byo kuyishimira kuruta ibyo tuyisaba.

Mubyo usengera banza ushyire imbere inyungu z’Imana

Mugihe ijambo ry’Imana ritubwira gusaba ,gukomanaga, mbese dushishikarizwa gusengera muri byose, ariko by’umwihariko ibyacu bwite. Aha rero bisaba ko uba umunyabwenge ukereka Imana ko ushishikajwe n’bijyanye n’umurimo wayo (nk’agakiza, n’icyubahiro cyayo ku isi), gusengera ibyo Imana idusaba gusengera nk’umukoro cyangwa akazi twasigiwe mu isi, nibyo bisobanura gusengera mu bushake bw’Imana kandi Imana yiteguye gusubiza bene ayo masengesho vuba, kandi ihindukire iguhe umugisha urenze n’ibyo wowe wifuzaga.

Shishikarira gushaka Umwuka wera, aguhuze na Yesu

Imana yaturemye kugirana umubano nayo, kandi kandi uwo mubano ufite aho ugomba guturuka. Niba rero wagize icyo cyifuzo mu mutima wawe, bwira Yesu ko ushaka kwihuza nawe. Ibi ni ngombwa rwose. Mubwire ko umwifuza mubuzima bwawe. Musabe kukwiyereka. Bumwe mu buryo bw’ingenzi akwiyerekamo ni imirimo y’Umwuka Wera. Umwuka naza, azaguhindura Yesu azataha mu mutima wawe kuburyo nawe Uzumva ukubaho kwe muri wowe. Wishimire ko mugomba guhuza byimazeyo kandi bidasubirwaho.

Jya wiringira Yesu kubwa mwuka wera kugirango ubone ibisubizo byiza mumasengesho yawe usenga , ikindi ujye ushimira Imana. Yesu abivuga muri aya magambo ati:“Mugume muri jye, nanjye ngume muri mwe. Nkuko ishami ritabasha kwera imbuto ubwaryo ritagumye mu muzabibu,niko namwe mutabibasha nimutaguma muri njye” (Yohana 15: 4)

Komeza kunga ubumwe na Yesu, kandi azakomeza kubana nawe. Ishami ntirishobora kwera imbuto ubwaryo; keretse igihe rigumye mu muzabibu. Muri ubwo buryo rero , ntushobora kwera imbuto keretse ugumye muri Yesu (Yohana 15: 4)

Nigute dushobora kurinda iyi sano dufitanye na Yesu kubwa Mwuka Wera? Yesu yaravuze ati: "Nimukurikiza amategeko yanjye, muzaguma mu rukundo rwanjye, nk’uko nakurikije amategeko ya Data kandi nkaguma mu rukundo rwe." (Yohana 15:10).
Kiranuka kandi wubahe Imana

Amasengesho y’umuntu uciye bugufi kandi ugerageza gukiranuka agira akamaro kanini. (Yakobo 5:16) Rigira riti: "Isengesho rivuye ku mutima ry’umukiranutsi rifite imbaraga nyinshi kandi ritanga umusaruro uhagije." Rero, ibi bidufitiye akamaro cyane kuko dukeneye rwose kubona ibisubizo byiza binyuze mu masengesho. Ikindi birakwiye ko twibonera ubwacu imbaraga z’amasengesho dusenga. Gusenga kwacu tuzabifashwamo n’umwuka wera.

Ibi tugomba kubimenya yuko turi abakiranutsi kubw’impano y’Imana.Tuzajya mu ijuru kubera amaraso ya Yesu, no kwezwa na we.

Source: wwwchristian faith.com

Umwanditsi: Byiringiro Daniel