Ubuhamya bwa Adda Darlene,uko Imana yamukijije

Kwamamaza

agakiza

Ubuhamya bwa Adda Darlene,uko Imana yamukijije covid-19


Yanditswe na: Ubwanditsi     2021-02-08 06:02:17


Ubuhamya bwa Adda Darlene,uko Imana yamukijije covid-19

Kiyange Adda Darlene, Umuvugabutumwa mu itorero ADEPR arubatse afite umutware n’abana babiri. N’umunezero mwinshi arashima Yesu ko yabanye na we mu kato, akamuhumuriza ndetse yamukijije covid-19. Aboneraho kandi guhwitura abakerensa iki cyorezo ko bakwiye guhindura imyumvire.

Mu magambo ye Adda arasobanura uburyo yarwaye ndetse n’uburyo imana yamukijije icyorezo cya covid-19.

Ati “Impamvu narwaye covid-19 nkayikira, byari ukugira ngo nzabashe kuvuga imbaraga z’Imana. Hari amagambo ngira ngo dusangireavuga imbaraga z’Imana mu gukiza indwara Kuva 23:25 “Kandi muzakorere Uwiteka Imana yanyu, na yo izaha umugisha umutsima wawe n’amazi yawe, kandi nzakura indwara hagati muri mwe”.

“Nari umwe mu bantu bazi kwirinda ngakarababa intoki neza, nkirinda gusuhuzanya, nkambara agapfukamunwa neza ariko burya birashoboka ko umuntu yarangara akaba yakoze ahantu hari covi-19 hanyuma akikoraho.Mbese ni ibintu bibaho umuntu atabizi. Byabaye ngombwa ko twipimisha n’abandi twari kumwe maze bambwira ko nanduye, nahise menyesha abo mu rugo ko nanduye maze umutware ahita yihuta aza kwipimisha, ariko we basanze ari muzima.

Kuva icyo gihe abashinzwe gukurikirana abarwayi ba covid19, bahise bampamagara bambaza ibimenyetso mfite, icyakora uwo mwanya nta bimenyetso bidasanzwe nari mfite, uretse kumva ka gripe, agakorora n’intege nke. Bambwiye ko ngomba kujya mu rugo hazagira igihinduka nkabahamagara, muganga yakomeje kunganiriza kuri whatsapp turebana areba uko meze akoresheje video call, ibi byaramfashije cyane uburyo bamabaye hafi.

Bangiriye inama ko ngomba kujya mu cyumba cya njyenyine, nkakoresha ibikoresho bya njyenyine, ubwiherero bwa njyenyine. Ngeze mu rugo nabigenje ntyo ariko icyiyongereyeho nagombaga gukora siporo kuko ari ingenzi.

Mubyukuri Imana yabanye nanjye mu kato (aho ntemerewe guhura n’abandi) aha hantu nahagiriye ibihe byiza, nararirimbaga, ngasenga mbese narasinziraga nkarota Imana ikampishurira byinshi. Mubyukuri Imana yagumanye nanjye n’ubwo itahise inkiza ako kanya, ariko yari irimo gukorana na njye natabwo umurimo w’Imana muri njye wigeze uhagarara.

Imana yagiye iganira na njye mu bihe bikomeye kuko uko iminsi yagendaga yicuma niko nageraga mu bihe bikomeye nkumva mbabara mu gatuza ndetse hari igihe guhumeka byambereye ikibazo mpita mbwira Yesu nti “Wamapaye Umwuka Wera, kandi Umwuka Wera ni umwuka, none wambabariye ukampa oxygene? Ubungubu mukanya baraza banjyane njye kwishyura kandi oxygene urayifite , wambabariye ukayimpa koko? Muri uwo mwanya numvise ijwi rimbwira ngo humura witinya.

Numvise nkomeye ndavuga ngo reka ndyamye Umwami Yesu amaze impungenge. Naryamye mu buryo bugoye, narasohokaga ngo numve ko nahumeka ariko Imana abanye nanjye mbona buracyeye”.

Iryojoro nabuzemo oxygene hari ku munsi wa gatatu bamaze kumbwira ko ndwaye, bwaracyeye bigeze nka 13:00 nongeye kumva ijwi ry’Imana rimbwira riti “Ngukijije icyago cyawe.Nahise numva mu gatuza hafungutse mpumeka neza, mbese numva cya kintu cyari gifungiranye gikuweho. Mubyukuri sinari nkize burundu kuko gripe yari igihari ariko ikibazo cyo kubura umwuka cyari gishize. Nahise nsinzira ariko nkomeza kubahiriza amabwiriza yose bampaye”.

Ku munsi wa 14 nagombaga kujya kwa muganga kwipimisha ngo barebe ko nakize,ariko nakomeje kubyangira mvuga ko nzajyayo ku munsi ukurikira. Mugitondo ndi muri siporo mu rugo, nongeye kumva ijwi rirambwira ngo jya kwa muganga kuko nagukijije noneho abantu banjye baruhuke mu mitima yabo. Bivuze ngo abansengera nibumva ko nakize baruhuke mu mitima yabo.

Nagiye kwa muganga nzi neza ko nakize mvuga ko ngiye kuzana igisubizo nkakibwira bene Data ngo bumve ko nakize baruhuke mu mitima. Ngeze kwa muganga bampaye igisbizo cy’uko nakize, nuko mpita mbwira bene Data ngo bahagarike kunsengera nakize, nabo bashimye Imana bigenda neza”.

Asoza ubuhamya bwe, Adda Darlene Kiyange arashima Imana yamukijije covid-19, ariko agira n’ubutumwa atanga ku batuye isi cyane abakerensa iki cyorezo bavuga ko ari ibintu bya politike, ari imikino, n’andi mazina menshi babyita kandi bakarangara bakarwara, nyamara Yesu ashaka ko abantu birinda kuko icyorezo cyo kirahar,i kandi aboneraho guhumuriza abayirwaye koYesu ahari ko icyo asabwa ari ukwizera kuko Imana yatwemereye ko izadukiza indwara.

Source:Sinai tv

Vestine@agakiza.org

Ibitekerezo (0)

Tanga igitekerezo

Amategeko n'amabwiriza arakurikizwa

Haba hari icyemezo ufashe nyuma y'ubu butumwa ?