Ubuzima n’amateka byaranze Umwanditsi Derek Prince

Umwanditsi, intiti mu kwigisha Bibiliya akaba n’umukurambere mu by’umwuka Derek Prince yavutse kuwa 14 Kanama 1915 apfa ku wa 24 Nzeri 2003, azize indwara y’umutima yari amaranye igihe kirekire. Derek Prince yanditse ibitabo birenga 50, birimo "Shaping History through Prayer and Fasting " iki gitabo cyahinduwe mu ndimi zirenga 100 gikwirakwizwa hirya no hino ku Isi.Yatangiye kwigisha ku nsanganyamatsiko zikomeye nk’imivumo y’ibisekuruza n’ ubusobanuro bwa Isiraheli muri Bibiliya.

Derek Prince yavukiye muri Bangaluru, mu Buhinde kuwa 14 Kanama 1915, avukira mu muryango w’abasirikare b’Abongereza . Derek yize muri Eton College nyuma akomereza muri Kaminuza y’Abaheburayo (Hebrew university) mu gihugu cya Isiraheli. Mu buzima bw’ishuri yize filozofiya (philosophie)

Mu rwego rwo gushakisha igisubizo nyakuri cy’ubuzima, Derek Prince yiyemeje kwiga filozofiya. Nyuma y’igihe gito yasanze kuriwe filozofiya idafite igisobanuro gifatika cy’ubuzima, ahindukirira imigenzo y’i Burasirazuba: yoga, tewozofiya na voodoo ariko nabyo ntibyamunejeje kuko byamuviriyemo kugira ubwihebe, ariko usubije amaso inyuma usanga yarageze ku nsinzi ukurikije ibyo Isi igenderaho.

Derek yubatse izina mu masomo yakurikiranye aho yanditse igitabo cyamenyekanye cyane ku byerekeranye na plato, igisobanuro n’ihindagurika ryayo.Yanditse imivugo mu Kilatini no mu Kigereki. N’ubwo byari bimeze bityo, yakomeje kuba mu rujijo ababajwe n’iyi Si kuko yifuzaga kumenya ikintu cy’ukuri.

Mu ntambara ya kabiri y’Isi, mbere y’uko igisasu cya mbere kiraswa mu Bwongereza, yatumijwe n’urukiko bamubaza niba ashobora kuba umurwanyi witwaje intwaro hanyuma Derek ababwira ko atabishobora kuko yatekerezaga ko atazabona umwanya wo gusoma ibitabo no gukurikira filozofiya, bityo bamwinjiza mu gisirikare cya cyami kitamusabaga kurwana.

Uyu mugabo yahise afata icyemezo aragenda agura Bibiliya y’umukara ya King James. Derek Prince yasomye iyo Bibiliya kuva mu Itangiriro arayirangiza ahita abona ko akeneye gushaka Imana kurushaho.
Derek Prince akiri umusore yakundaga gusoma

Ijoro rimwe ubwo abandi bose bari basinziriye, Derek yashyize intwaro ye mu idirishya, yiyemeza gusenga kugeza ubwo hari ikintu kibaye. Kuko atari yarigeze gusenga na rimwe, ntiyari azi icyo kuvuga cyangwa icyo gusengera.

Muri iryo sengesho rye Derek yarahindutse aho yagize ati:" Kuva uwo munsi sinongeye gushidikanya ko Yesu ariho. Mvumbuye icyo nari narananiwe kumva igihe kirekire. Muri Yesu mbonyemo icyo nari narabuze imyaka myinshi y’ubuzima bwanjye bwose.

Icyo gihe Derek yahise yimurwa avanwa mu Bwongereza ajyanwa muri Afurika ya Ruguru. Derek yamenye Imana ku giti cye binyuze mu gusoma Bibiliya nta mu Pasiteri cyangwa umwalimu umwigishije, ndetse abatizwa mu mwuka wera atangira kumva ijwi ry’Imana.

Mu mwaka wa 1946, Derek yashakanye na Lydia Christensen wari warashinze ikigo kita ku bana ahongaho i Yerusalemu. Derek yahindutse se w’abakobwa umunani Lydia yareraga harimo batandatu b’abayahudi, umwe w’umunyapalesitina, umwe w’umwarabu.
Derek n’umugore we Lydia

Mu 1963, Derek na Lydia bimukiye muri Amerika aho yayoboye itorero i Seattle Derek yatangiye kwigisha Abanyamerika uburyo bwo gusengera igihugu cyabo. Mu 1973, yabaye umwe mu bashinze ivugabutumwa no gusenga muri Amerika. Igitabo cye cyitwa "Shaping History trough Prayer and Fasting" cyakanguriye ye abakristu batuye Isi inshingano zo gusengera Leta zabo. Bidashidikanywaho, ubusobanuro bw’iki gitabo bwagize uruhare runini mu kugwa k’ubutegetsi bwa gikomunisiti muri Union of Soviet Socialist Republics (USSR), Ubudage bw’Uburasirazuba na Cekosolovakiya.

Mu 1968, Derek yakoranye cyane n’abandi bigisha ba Bibiliya bazwi cyane nka Don Basham, , Bob Mumford na Charles Simpson.

Derek Prince yatangije Minisiteri y’ivugabutumwa aho yahuguraga abamisiyoneri, abayobozi b’amatorero yakoreraga mu biro (bureau) 13 ku Isi. Ibikorwa bye byamamaye ku rwego mpuzamahanga.Yamenyekanye cyane mu kiganiro "Urufunguzo rwo kubaho neza" kuri radiyo izwi nka "Derek Prince Legacy Radio" cyatangiye mu 1979 kandi gihindurwa mu ndimi zirenga 10. Inyigisho ya Bibiliya ya Derek Prince imaze kugera aharenga 1/2 cy’Isi.

Derek n’umugore Ruth wasimbuye Lydia amaze gupfa

Lydia Prince yapfuye mu 1975, Derek Prince ashakana na Ruth Baker (wareraga abana 6) Ruth nawe yapfuye mu Kuboza mu 1998 i Yerusalemu aho bari batuye.

Derek Prince yakoreye ivugabutumwa ku migabane 6 y’Isi. Mu 2002 yaravuze ati: "Ni icyifuzo cyanjye kandi nizera ko Imana yifuza ko uyu murimo yatangije mu myaka 60 ishize ukomeza kugeza Yesu agarutse."

Derek Prince yasize abana 11 n’umuryango munini w’abantu barenga 150. Yari afite imyaka 88. Umuhango wo gushyingura wabereye i Yeruzalemu ku wa Gatanu, tariki ya 26 Nzeri 2003, naho umuhango wo kwibuka wabereye i Charlotte, muri Karolina y’Amajyaruguru, ku wa Gatandatu Ugushyingo 2003.

Source: www.dpisrael.com; derekprince.org

Vestine@agakiza.org