Ubwongereza:Abayobozi b’Itorero barahamagarira igihugu gusenga mugihe batangiye guma mu rugo.

Nk’uko gahunda ya guma mu rugo (lockdown) ku ncuro ya kabiri itangiye mu Bwongereza Musenyeri wa Canterbury na Musenyeri wa York barimo gusaba abantu kwishyira hamwe bagasenga Imana.

Mu ibaruwa bandikiye abanyagihugu, bavuze ku nzitizi n’ibihe bikomeye bikikijwe n’ubwoba ndetse n’imibabaro.

Ibaruwa iragira iti:"Hari inkuru muri Bibiliya aho Yesu n’abigishwa be bafashwe n’umuhengeri ubwo bari mu bwato. Abigishwa bari bafite ubwoba igihe umuyaga n’umuhengeri wabarushaga imbaraga. Yesu yarababajije ati:"Kuki mufite ubwoba?".

"Muri uyu mwaka, natwe twafashwe n’umuraba bisa nk’aho wenda kuturusha imbaraga. Ariko dukwiye kureba kuri Yesu uri kumwe na twe mu bwato, agacyaha umuraba ndetse akaduhumuriza mu gihe cy’ubwoba".

Nyuma yo kumenya ko bitoroshye kugira ibyiringiro, bahamagariye abantu gusenga no gusaba umutuzo, umutima w’impuhwe mu rwego rwo guhangana n’inzitizi za guma mu rugo ibaye ku ncuro ya kabiri.

Abasenyeri bombi bakomeje bagira bati:"Turimo kwandika kugira ngo tubasangize ibyiringiro byacu, abo muri bo bose, Imana irabakunda bitagira akagero".

"Turashaka kandi ko mumenya ko turimo kubasengera, by’umwihariko dusaba urukundo rwa Kristo kuduhumuriza, kutumara ubwoba, no kuyobora igihugu cyacu muri iki cyorezo giteye ubwoba".

Basobanuye kandi icyo ubutwari n’impuhwe bivuze bati:"Ni ukwegera abaturanyi banyu n’ubwitonzi kandi mugafashanya muri byose".

Abasenyeri (Archbishops) barimo gusaba abakristo gusenga buri munsi saa kumi n’ebyiri z’umugoroba mugihe cy’ibyumweru bine bya guma mu rugo batangiye.

Ibi ni ibyatangajwe n’Itorero ry’Ubwongereza hagamijwe kwishyira hamwe mu kwezi kwahariwe amasengesho.

Abasenyeri bakomeje bagira bati:"N’ubwo hari umwijima mwinshi utugose, hari ibyiringiro by’umucyo mu byumweru bigiye kuza harimo Noheri ifite ubutumwa butubwira ko Imana iri kumwe na twe. Tuyibwire ibitugoye n’ibitubabaje byose maze iduhe umutuzo n’umunezero".

"Nk’uko twibuka ubutwari n’ubwitange byaranze abitangiye iki gihugu mu ntambara, twibutse kandi ko hari icyizere cyo kubona amahoro nyuma yo kwangirika ndetse no kubona ubuzima nyuma y’imibabaro".

Source: www.christiantoday.com

Vestine@agakiza.org