Dore ibyo Imana isezeranya guha abana bayo

Abana b’Imana bafite umudendezo n’uburinzi busesuye. Si ukuba bafite Imana nk’umubyeyi wabo , Umwami Yesu nk’umukiza n’Umutambyi mukuru ubahuza na se n’Umwuka Wera ubana nabo akabafasha mu gihe bamukeneye, ahubwo bafite n’isezerano Imana yabahaye ryo kubatera imbaraga rikabaha ibyiringiro iyo babayeho ubuzima yishimira.

Abana bakundwa b’Imana, babona ibintu byose bakennye binyuze mu kiganza cyayo. Kugirango tugufashe kubaho udafite ubwoba, hano hari imigisha Imana iha abana bayo bizera Kristo bakamushakiramo ubuhungiro:

1. Nta ntwaro yakorewe kukurwanya

“ Dore ni jye urema umucuzi uvugutira umuriro w’amakara agakuramo icyuma akoresha umurimo we, kandi umurimbuzi namuremeye kurimbura. Ariko nta ntwaro bacuriye kukurwanya izagira icyo igutwara, kandi ururimi rwose ruzaguhagurukira kukuburanya uzarutsinda. Ibyo ni byo murage w’abagaragu b’Uwiteka, kandi uko ni ko gukiranuka kwabo guturuka aho ndi.” Ni ko Uwiteka avuga.” (Yesaya54:16-17)

Kuko ari Yo yaremye umucuzi ucura intwaro zishobora kuturwanya, Imana ivugako nta ntwaro yakorewe kuturwanya izagira icyo idutwara. Niba twubashye Kristo, tuzanesha ibiturwanya ibyo ari byo byose.

2. Gutabarwa mu bikomeye

“Kuko yankunze akaramata ni cyo nzamukiriza, Nzamushyira hejuru kuko yamenye izina ryanjye. Azanyambaza nanjye mwitabe, Nzabana na we mu makuba no mu byago, Nzamukiza muhe icyubahiro. Nzamuhaza uburame, Kandi nzamwereka agakiza kanjye.” (Zaburi 91:14-16)

Imana yasezeranije gukiza abayikunda. Dushobora guhura n’ibirushya bike cyangwa byinshi ariko Umuremyi w’isi akaba na se w’abari muri Kristo bose yadusezeranije kudutabara kandi afite ubushobozi bwo kudukiza.

“Uwiteka Imana yawe iri muri wowe imbere, ni intwari kandi irakiza. Izakwishimana inezerewe. izaruhukira mu rukundo rwayo, izakunezererwa iririmba.”(Zefaniya3:17)

3. Byose bifataniriza kutuzanira ibyiza

“Kandi tuzi yuko ku bakunda Imana byose bifataniriza hamwe kubazanira ibyiza, ari bo bahamagawe nk’uko yabigambiriye, kuko abo yamenye kera yabatoranirije kera gushushanywa n’ishusho y’Umwana wayo, kugira ngo abe imfura muri bene se benshi. Abo yatoranije kera yarabahamagaye, kandi abo yahamagaye yarabatsindishirije, n’abo yatsindishirije yabahaye ubwiza. Ubwo Imana iri mu ruhande rwacu umubisha wacu ni nde?”( Abaroma8:28-30)

Nidukunda Imana by’ukuri, tuzaba twizeye umudendezo udashira, kandi buri kintu cyose cyatubaho cyangwa kitwugarije kizaba umugisha wo gutuma dusa na Kristo.

Tubifurije gukunda Imana by’ukuri!

Sophie@agakiza.org