Dore ibihamya bigaragaza ijuru abizera bazabamo

Bibiliya itubwirako Ijuru ribaho, ariko abenshi ntibabyizera. Birababaje kumva hari abakristo bafite isura itariyo y’uburyo ijuru rimeze, bigatuma babaho ubuzima bukennye, budakuze ariko kumenya uko ijuru risa bidufasha kugumisha ibyiringiro byacu kuri Kristo no ku masezerano ye.

Aha hari ibihamya byerekeye ijuru byagufasha kurwana intambara nziza yo kubaho ubuzima bwo kwizera muri Yesu kugira ngo uzabe mu mubare wabazaryinjiramo:

1. Tuzabaho iteka mu ijuru, kubw’ ibyo Kristo yakoze

“Kuko Imana yakunze abari mu isi cyane, byatumye itanga Umwana wayo w’ikinege kugira ngo umwizera wese atarimbuka, ahubwo ahabwe ubugingo buhoraho.”(Yohana3:16) .Niba twizera umurimo Kristo yakoze, tuzabaho ubuzima buhoraho bwo mu ijuru.

2. Nta hantu heza ho mu isi wagereranya no mu ijuru

“Abo bose bapfuye bacyizera batarahabwa ibyasezeranijwe, ahubwo babiroraga biri kure cyane bakabyishimira, bakavuga ko ari abashyitsi n’abimukīra mu isi. Abavuga batyo baba berekana yuko bashaka gakondo. Iyo baba barakumbuye iyo bavuyemo, baba barabonye uburyo bwo gusubirayo.
Ariko noneho barashaka gakondo irusha icyo gihugu kuba cyiza, ari yo yo mu ijuru. Ni cyo gituma Imana idakorwa n’isoni zo kwitwa Imana yabo, kuko yabiteguriye umudugudu.”(Abaheburayo11:13-16)

Nta hantu mu isi hagereranywa n’ubwiza bw’aho Imana yaduteguriye ariho mu ijuru. Nicyo gituma abagabo n’abagore bizeraga bishimiraga kwimukira muri icyo gihugu aho bazaba mu byishimo bidashira babana n’Imana.

3. Nta mubabaro uzaba mu ijuru

“Numva ijwi rirenga rivuye kuri ya ntebe rivuga riti “Dore ihema ry’Imana riri hamwe n’abantu kandi izaturana na bo, na bo bazaba abantu bayo kandi Imana ubwayo izabana na bo ibe Imana yabo. Izahanagura amarira yose ku maso yabo kandi urupfu ntiruzabaho ukundi, kandi umuborogo cyangwa gutaka cyangwa kuribwa ntibizabaho ukundi kuko ibya mbere bishize.”(Ibyahishuwe21:3-4)

Imana ubwayo izabana n’abantu bayo mu bwami bwayo kandi nta mubabaro uzongera kubaho, ntagahinda, nta n’amarira kuko tuzahanagurwa amarira yacu yose.

4. Abakijijwe na Yesu kandi bakora ibyo Data ashaka nibo bazinjira mu bwami bwo mu ijuru

“Umuntu wese umbwira ati ‘Mwami, Mwami’, si we uzinjira mu bwami bwo mu ijuru, keretse ukora ibyo Data wo mu ijuru ashaka. Benshi bazambaza kuri uwo munsi bati ‘Mwami, Mwami, ntitwahanuraga mu izina ryawe, ntitwirukanaga abadayimoni mu izina ryawe, ntitwakoraga
ibitangaza byinshi mu izina ryawe?’ Ni bwo nzaberurira nti ‘Sinigeze kubamenya, nimumve imbere mwa nkozi z’ibibi mwe.”(Matayo7:21-23)

Abakurikiye Yesu gusa nibo bazinjira mu bwami bwo mu ijuru. Niba tuvuga ko turi abakristo ariko tukabaho ubuzima budashimisha Imana ntibwubahe ibyo ishaka ntituzakingurirwa.

5. Ubwami bw’ijuru buba muri twe

“Abafarisayo baramubaza bati “Ubwami bw’Imana buzaza ryari?” Arabasubiza ati “Ubwami bw’Imana ntibuzaza ku mugaragaro, kandi ntibazavuga bati ‘Dore ngubu’, cyangwa bati ‘Nguburiya’, kuko ubwami bw’Imana buri hagati muri mwe.”(Luka17:20-21)

Niba hariho ijuru ritegereje abapfuye bizeye, Ijuru dushobora no kuribamo kubera ibyo Kristo yakoze. Umwuka w’Imana uba mu bamwizera kandi uko twubaha Imana niko ibana natwe no mu gihe tukiri hano mu isi:

“Yesu aramusubiza ati “Umuntu nankunda azitondera ijambo ryanjye, na Data azamukunda, tuzaza aho ari tugumane na we.”(Yohana14:23)

Abakristo bakwiye guharanira gukora ibyo Umwami ashaka kugirango bazature muri icyo gihugu kirusha ibindi kuba cyiza, kirangwamo umunezero, aho kurira kutazongera kubaho ukundi.

Mbifurije kuzatura mu bwami bw’Imana!

Sophie @Agakiza.org