Dore inyungu twakuye mu gakiza twahawe na Kristo

“Mutima wanjye himbaza Uwiteka, Ntiwibagirwe ibyiza yakugiriye byose.”(Zaburi102:2)

Kristo yaduhaye byinshi biruta ibyo dushobora gusaba no gukorera kugira ngo tubibone. Agakiza twakuye muri we ni urufunguzo rw’imigisha itarondoreka ni umuryango w’isi nshya aho tuzabona urukundo rusesuye no kuzabaho ubuzima buhoraho.

Iyi migisha yose twayihawe binyuze muri Kristo, kuko yarangije ibyo tutashoboraga gukora . Ni cyo cyatumye yemera kubabara kugira ngo adukize , yemera gutandukana na Se kugirango atubone , apfira kumusaraba kugirango adushakashake( Yesaya53:6, Abaroma4:25).

“Ni ukuri intimba zacu ni zo yishyizeho, imibabaro yacu ni yo yikoreye, ariko twebweho twamutekereje nk’uwakubiswe n’Imana agacumitwa na yo, agahetamishwa n’imibabaro. Nyamara ibicumuro byacu ni byo yacumitiwe, yashenjaguriwe gukiranirwa kwacu, igihano kiduhesha amahoro cyari kuri we, kandi imibyimba ye ni yo adukirisha. Twese twayobye nk’intama zizimiye, twese twabaye intatane, Uwiteka amushyiraho gukiranirwa kwacu twese.”(Yesaya 53:4-6)

Kwemera kubabara kwe kwakoze byinshi birenze uko twabyumva cyangwa twabitekereza, birenze uko umutima n’ubwenge bwacu bwabitekereza, kuko ubwacu ntitwari kubishobora.

Kugirango tugufashe kubaho mu gakiza kuzuye ka Kristo, aha hari inyungu twavanye mu rupfu no kuzuka bye:

Byatumye tumenya inzira ijya ku Mana

“Yesu aramubwira ati “Ni jye nzira n’ukuri n’ubugingo: Nta wujya kwa Data ntamujyanye”(Yohana14:6)

Kristo yabaye umuyobozi utugeza ku Mana. Mugihe icyaha cyadutandukanyaga n’urukundo rw’Imana, Kristo yemeye kudukura muri ubwo bubata bw’icyaha atuma twiyunga na Se. binyuze muri Kristo, ubu twemerewe kumwita Data kandi dukundwa na we(Abaroma8:31-39).

Twabonye amahirwe yo kuba abana bayo

“Mwese muri abana b’Imana mubiheshejwe no kwizera Kristo Yesu, kuko mwese ababatirijwe muri Kristo muba mwambaye Kristo. None ntihakiriho Umuyuda cyangwa Umugiriki, ntihakiriho imbata cyangwa uw’umudendezo, ntihakiriho umugabo cyangwa umugore, kuko mwese muri umwe muri Kristo Yesu. Ubwo muri aba Kristo muri urubyaro rwa Aburahamu, muri n’abaragwa nk’uko byasezeranijwe.(Abagalatiya3:26-29)

Uretse kuba dushobora kwita Imana Umubyeyi wacu, by’umwihariko turi abana bayo bwite binyuze mu maraso ya Kristo. Biciye muri Kristo, tunezezwa n’ amahirwe y’ibyiza Imana iduha, kandi nitwegera intebe y’ubuntu tuzababarirwa( Abaheburayo 4:16). Muri Yesu niho twaherewe imigisha yose (Abefeso1:3).

Byaduhaye ibyiringiro byo kuzabona ubugingo buhoraho

“Ni we namwe mwiringiye mumaze kumva ijambo ry’ukuri, ari ryo butumwa bwiza bw’agakiza kanyu, kandi mumaze kwizera ni we wabashyizeho ikimenyetso, ari cyo Mwuka Wera mwasezeranijwe, uwo twahawe ho ingwate yo kuzaragwa wa murage kugeza ubwo abo Imana yaronse izabacungura. Ubwiza bwayo bushimwe.”(Abefeso1:13-14)

Uretse kwizera ubugingo buhoraho nyuma y’ubuzima bwa hano ku isi , tunizeye ubugingo bwuzuye(10:10). Imana yaduhaye Umwuka Wera- umwuka umwe nk’uwazuye Kristo mu bapfuye . Umwuka Wera watumye tubaho twizeyeko Imana itazadusiga cyangwa ngo itureke.

Binyuze muri Kristo twemerewe kuba abana bakundwa b’Imana, niyo mpamvu tudakwiye gukerensa amaraso yatumye tuba mubazaragwa igihugu cyiza twasezeranijwe.

Sophie @Agakiza.org