Dore uburyo bwagukundisha gusenga mu gihe utabikunda

“Mwishime iteka, musenge ubudasiba, mu bibaho byose muhore mushima, kuko ari byo Imana ibashakaho muri Kristo Yesu.”(1Abatesalonike 5:16-18)

Ijambo ry’ Imana ridusaba gusenga ubudasiba. Bivuzeko dukwiye gusenga tudahagarara. Ibi bishobora kumvikana nk’ibidashoboka ndetse abenshi bakumva batabihaye agaciro, ariko ukuri ni uko dukwiye gusenga Imana igihe cyose n’ubwo twaba twumva tutabishaka.

Ese ujya wumva udashaka gusenga cyangwa ukabanza kubyishakamo mbere y’uko usenga? Niba ariko bigenda ukwiye kumenya ibi: Uko wiyumva, amarangamutima, … si impamvu yatuma usenga cyangwa utabikora. Ahubwo ukeneye gusenga utagendeye uko wumva umeze. Kandi ukeneye gukunda gusenga no mugihe wumva utabikunze. Mu byukuri buri mukristo ufitanye umubano n’Imana ntiyabaho atabasha kuyisenga, kandi ntibikwiye kugibwaho impaka.

Kugira ngo tugufashe kubyumva neza tekereza ku bantu baba hafi yawe/ baguhora hafi, abo bantu wishimira kuba muri kumwe igihe cyose. Ese ujya umenya impamvu bari kumwe na we ? Ese ujya wibaza ukuntu ushobora kuvugana nabo buri gihe muganira ku bintu bitandukanye kandi mugashobora guhuza? Ese ujya wishimira umubano mufitanye n’ukuntu ugenda ukura, utera imbere? Niba ariko bimeze uraza kubona ishusho y’uburyo gusenga ari byiza.

Tugendeye ku nkoranyamagambo(dictionaire) ya Webster yo 1828, igaragazako isengesho ari igikorwa cyo gusaba ubufasha cyane cyane ukabikora bikuri ku mutima / ufite ubushake. Tugendeye kuri ubu busobanuro, turumvako isengesho ari ibintu dusaba Imana ko yadukorera.

Umwami Yesu, yatweretse ko nk’abana b’Imana binyuze muri we, tubwira ibyifuzo byacu Imana nk’umwana ubwira se.

“…. kuko So azi ibyo mukennye mutaramusaba. Nuko musenge mutya muti “ ‘Data wa twese uri mu ijuru, Izina ryawe ryubahwe, Ubwami bwawe buze, …..(Matayo6:8-15)

“Mbese muri mwe hari umuntu umwana we yasaba umutsima akamuha ibuye, cyangwa yamusaba ifi akamuha inzoka? Ko muri babi kandi mukaba muzi guha abana banyu ibyiza, none So wo mu ijuru ntazarushaho guha ibyiza ababimusabye?”( Matayo7:9-11)

Ni gute wakunda gusenga?

Tumaze kumva ko dufite uburenganzira bwo kuza ku Mana umubyeyi wacu. Nk’abana bayo, ntayindi nzira yabidushoboza uretse gukunda gusenga.
Aha hari uburyo bwadukundisha gusenga :

Banza ushimishwe nuko Imana ari umubyeyi ugukunda

Ni gute utakwishimira ibyishimo biri muri Kristo, ufite Imana nk’umubyeyi ushobora kukwegera ukizera kwakira urukundo ruzima igihe cyose usenze?

Ha agaciro uburyo ushobora kugira icyo uyibwira igihe cyose, n’uburyo igira icyo igukorera binyuze mu ijambo ryayo n’Umwuka wayo.

“Nuko rero, twegere intebe y’ubuntu tudatinya, kugira ngo tubabarirwe tubone ubuntu bwo kudutabara mu gihe gikwiriye.(Abaheburayo4:16)

“Uwo Mwuka w’ukuri naza azabayobora mu kuri kose kuko atazavuga ku bwe, ahubwo ibyo azumva ni byo azavuga, kandi azababwira ibyenda kubaho. Uwo azanyubahiriza, kuko azenda ku byanjye akabibabwira. Ibyo Data afite byose ni ibyanjye, ni cyo gitumye mvuga nti ‘Azenda ku byanjye abibabwire.”(Yohana16:13-15)

Ni gute utishimira gusenga Imana utitaye ku bihe waba urimo, kandi ishoboye kudusubiza? Ni byiza kwitoza gusenga igihe cyose, waba ubabaye cyangwa wishimye, urwaye,...kuko yumva icyo tuyisabye kandi ikadusubiza.

Menya ko umubano wawe na Yo ukura , igihe cyose ugize umuhate wo kuyishaka no kumarana na yo igihe

“Ariko twebwe twese ubwo tureba ubwiza bw’Umwami, tubureba nko mu ndorerwamo mu maso hacu hadatwikiriye, duhindurirwa gusa na we tugahabwa ubwiza buruta ubundi kuba bwiza, nk’ubw’Umwami w’Umwuka.”(2Abakorinto3:18)

Ni byiza gukunda gusenga kuko bigira umumaro kandi bigatuma twizera uburinzi bw’Imana kandi tukagira uburenganzira bwo kuyisaba ibyo dukeneye byose.

Sophie @Agakiza.org