Bimwe mubyagufasha igihe ukora urugendo ukabyimba ibirenge

Hari ibintu byinshi ushobora gukora kugira ngo ugabanye guhura n’iki kibazo cyo kubyimba ibirenge igihe uri gukora urugendo kugirango ukomeze kugira ubuzima bwiza.

Abantu benshi cyane cyane abagore bakunze kubyimba ibirenge n’utugombambare igihe bakoze urugendo . Uku kubyimbirwa gukunze gufata iminsi runaka kugira ngo umuntu asubire mu buzima busanzwe.
Ese kubyimbirwa ibirenge wakoze urugendo hari ingaruka byatera ubuzima cyangwa hari icyakorwa kugira ngo umuntu abyirinde?
Kubyimba ibirenge n’utugombambare mu gihe wakoze urugendo rurerure ni ibintu bisanzwe. Mu gihe cy’urugendo rurerure, cyangwa kumara igihe kinini uri ahantu hamwe utanyeganyega , imikaya y’amaguru iba isa nk’ idakora, amaraso aba atembera mu mijyana y’amaguru, maze amwe mu matembabuzi akigira munsi y’agahu ko mubirenge.

Uku kubyimbirwa gukunze gufata iminsi kugirango amaguru asubire mu bihe bisanzwe. Ariko kubyimbirwa uko ari ko kose ntigutera ikibazo ku buzima bwawe , si ikintu gikwiye gutera impungenge uwahuye nacyo.
Kubyimbagana ibirenge bikunze kuba rusange ku bantu bakunze kugira ibibazo byo kubura intege/ imbaraga ariko mu gihe unaniwe cyane cyangwa ufite ikibazo cy’ubuhumekero byaba byiza ugiye kwizuzumisha ibijyanye n’amaraso.
Hari ibindi bintu wakora bikakugabanyiriza kuba wabyimbagana .Ni byiza kugerageza ukinyeganyeza uko bishoboka mugihe uri mu rugendo.
Niba uri kugendera mu ndege, gerageza wicare mu mwanya mwiza wo kuruhande,kugirango bigufashe kujya ushobora guhaguruka igihe ubishatse, ndetse unagendagende.

Igihe wicaye , jya ugerageza unanure ibirenge byawe, ubinyeganyeze, kandi unanure amano yawe, kandi ujye uzamura amaguru yawe wongera uyasubiza hasi, ubikore inshuro nyinshi, bizatuma amaraso atembera neza.
Indi nama wakurikiza, ni uko mugihe uribukore urugendo rurerure mu modoka , fata akanya ubanze ugendagende kugirango uze gushobora kugenda igihe kinini, bizagufasha kutabyimbirwa.