Inama zagufasha kugirana umushyikirano n’Imana

Abakristo basabwa kugirana umushyikirano n’Imana no kumara igihe basenga, baramya, basoma ijambo ry’Imana ari ryo bibiliya. Ni ingenzi cyane kugira iyi myitwarire muri uru rugendo rwo kugendana n’Imana. Niba dushaka umushyikirano na yo, ntitwabigeraho tudafata gihe ngo tuyegere.

Umwanya duha Imana ugomba kuba igihe cyo kwitonda kandi kirambuye ,igihe cyuzuye cyo kuyiyegereza. Dukwiye kubishyiraho umutima niba dushaka kugirana umubano wihariye. Ese urashaka kugira igihe cyihariye wihereranye n’Imana? Izi ni inama zagufasha kugira umushyikirano uri kumwe n’Imana:

Shyira ku ruhande ibintu byakurangaza, ubundi uturize imbere yayo

Nk’uko twabivuze haruguru, kwegera Imana bisaba kwitonda imbere yayo. Dukeneye gushyira ku ruhande ikintu cyose cyatubuza gushaka Imana. Yesu yagize ati:
“Maze Yesu abwira abigishwa be ati “Umuntu nashaka kunkurikira yiyange, yikorere umusaraba we ankurikire.”(Matayo6:24)

Ni inama isaba gukora, shyira ibintu byose ku ruhande byakurangaza. Ibintu byose ushobora gutekereza cyangwa kureba bikakurangaza. Bityo rero, ni ingenzi kwitoza kubana n’Imana mu isengesho no gusoma bibiliya ntakindi ushyizeho umutima.

Cecekesha ibiguhangayikishije n’ibyifuzo ufite, ureke Imana abe ariyo ivuga

Nubwo Bibiliya itubwirako dukwiye kuza ku Mana tukayibwira byose, dukeneye guceceka maze tukayiha ikaze. Dukeneye kwiga kudatinda mubyo twifuza ahubwo tukareka Imana ikavuga.

Abenshi muri twe bamara igihe kinini basaba Imana ibyo bakeneye aho kuyisaba gukora ibyo ubwayo ikeneye. Niba dushaka kwishimirwa n’Imana, tugomba kuyemerera ikatwuzura . Niba twuzuwemo no kwizirikana no gutinda kub’ibitubabaje, birumvikana ntituzayibonera icyumba mu mutima wacu. Yesu yagize ati:

“Nimuguma muri jye amagambo yanjye akaguma muri mwe, musabe icyo mushaka cyose muzagihabwa. Ibyo ni byo byubahisha Data, ni uko mwera imbuto nyinshi, mukaba abigishwa banjye.”(Yohana15:7-8)

Shimisha Imana kurusha ibindi byose

Gushyikirana n’Imana bisaba kwitonda, ukagira ibyo ureka kubera yo, ukayubaha. Bisaba kuyibandaho, utizirikana ngo wiyumve nk’aho wihagije. Intego yacu ikwiye kuba iyo kuyishimisha kuruta ibindi byose. Yesu ubwe yagize ati:

“Yesu aramusubiza ati “Umuntu nankunda azitondera ijambo ryanjye, na Data azamukunda, tuzaza aho ari tugumane na we.”(Yohana14:23)

Niba dushakako Imana iguma muri twe, dukwiye kuyegera tudafite ibiturangaza cyangwa ngo tuze tuzanye imibabaro yacu gusa, ahubwo dukwiye kuyitega amatwi tukumva ibyo ishaka ko dukora n’uburyo dukwiye kubaho tuyishimisha.

Sophie@agakiza.org